"Трамптың талпынысын жоюды көздейді": Зеленский Путиннің "Орешник" туралы мәлімдемесіне пікір білдірді

Украина президенті Владимир Зеленский өзінің Telegram-дағы арнасында Ресей президенті Владимир Путиннің ҰҚШҰ отырысында сөйлеген сөзіне жауап берді. Бұл туралы KAZ.NUR.KZ хабарлайды.

Жақында Астанада Владимир Путин "Орешник" жүйесі жайлы егжей-тегжейлі баяндап, әскерилердің бұл қаруды жаңа ықтимал шабуылдарда қандай мақсаттарға қолданатынын түсіндірген еді.

Зеленский бұл мәлімдемені "зымыран жарнамасы" әрі "өлтіру мен жоюға дайындықтың белгісі" деп атады.

"Украинаға атылған мыңдаған зымырандарға Путин тағы мыңдаған зымыран қосуды көздеп отырғаны анық. Ол соғысты аяқтауға мүдделі емес, керісінше, басқалардың бұл қақтығысты тоқтатуына кедергі жасауға тырысады.

Путин өзінің "Орешнигін" көрсетіп, Дональд Трамптың президенттік қызметіне кіріскеннен кейін соғысты тоқтату талпынысын жоюға бағытталған қадамдар жасауда. Ол жағдайды одан әрі ушықтырып, Трамптың соғысты тоқтатуына кедергі жасамақ", - деп есептейді Украина президенті.

Сонымен қатар Украина президенті Путиннің бұл әрекетін "АҚШ-қа қысым көрсетудің құралы" ретінде бағалады. Зеленскийдің айтуынша, Путиннің қазіргі қадамдары "АҚШ президентін Ресейдің шарттарын қабылдауға мәжбүрлеуге" бағытталған.

Ресей Украинаға соққы жасау кезінде орташа қашықтыққа ұшатын жаңа "Орешник" қаруын қолданғаны туралы алғыш Путиннің 21 қараша күні шыққан видеоүндеуінен белгілі болды. Әскери-өнеркәсіп нысанына жасалған соққы оны жойды.