Оңтүстік Кореяның қамаудағы бұрынғы қорғаныс министрі өз өзіне қол жұмсауға талпынған

Оңтүстік Кореяның бұрынғы қорғаныс министрі Ким Ён Хён Сеулдің шығысындағы тергеу изоляторында өз өзіне қол жұмсауға талпынған. Бұл туралы KAZ.NUR.KZ BBC Орыс қызметіне сілтеме жасай отырып хабарлайды.

Экс-министрдің бұл әрекетін парламенттің сәрсенбідегі тыңдауы кезінде жабық мекеменің басшысы Шин Ён Хэ баяндап берді. Шенеуніктің айтуынша, мекеменің бір қызметкері шұғыл түрде араласқандықтан Ким Ён Хён "бірден райынан қайтқан". Қазір экс-министрдің өміріне ешқандай қауіп төніп тұрған жоқ.

"Медициналық тексеру нәтижесі қамаудағы азаматтың денсаулығы жақсы екенін көрсетті", - деп мәлімдеді жергілікті әділет министрлігі.

Министрлік өкілінің жергілікті Рёнхап агенттігіне хабарлауынша, Ким сейсенбіде түнгі сағат 23:52-де, "Донгбу" қамауда ұстау орталығындағы жуынатын бөлмеде іш киімнен жасалған арқанға асылуға талпынған.

Осы оқиға Сеулдегі сот бұрынғы министрді ресми түрде қамауға алу жөнінде шешім шығарар қарсаңында болған. Сот оны бүлік ұйымдастыруға қатысы бар деген күдікпен қамаған. Ким Ён Хён жексенбі күні ұсталған.

Прокурор экс-министрге жиырма күн ішінде айып тағуға тиіс. Бүлік шығарды деген айыппен сотталса, Ким Ён Хён өлім жазасына кесілуі мүмкін.

Ким – елде әскери режим жариялау ісі аясында ұсталған алғашқы шенеунік. Құқық қорғау органдары оны президент Юн Сок Ёльге төтенше жағдай енгізуге кеңес берді, әскерді Ұлттық ассамблеяға жіберді деп айыптап отыр. Президент Юнның өзіне және тағы сегіз шенеунікке елден шығуға тыйым салынды.