Қырғызстанда төтенше жағдайлар министрлігінің экс-басшысы ұсталды (фото)

Қырғызстанның Ұлттық қауіпсіздік жөніндегі мемлекеттік комитеті Төтенше жағдайлар министрлігінің бұрынғы басшысын сыбайлас жемқорлыққа қатысы бар деген күдікпен ұстады. Бұл туралы KAZ.NUR.KZ ведомствоның мәлімдемесіне сілтеме жасап хабарлайды.

Қырғызстанның Ұлттық қауіпсіздік комитеті өкілдерінің мәліметінше, күдікті бұрын Жогорку Кенеш депутаты және Жалал-Абад облысының губернаторы қызметтерін атқарған. 1995-1996 жылдары "Қырғызтрансавто" мемлекеттік акционерлік қоғамының басқарма төрағасы лауазымында болған кезінде ол бірқатар заңсыз әрекеттерге барған деп күдіктелуде.

"Ол мемлекет қаражаты есебінен 'Тоқшұлық' мемлекеттік акционерлік қоғамының акцияларын сатып алып, кейіннен Балықшы ет комбинатының жылжымайтын мүлкін заңсыз жекешелендірген. Бүгінде бұл мүліктің құны 626 миллион сомға бағаланып отыр", – деп хабарлады комитет.

Ведомство мәліметінше, күдіктінің әрекеттеріне қатысты тергеу жалғасуда. Сонымен қатар сыбайлас жемқорлық схемасына басқа да тұлғалардың қатысы бар-жоғы анықталып жатыр. Заңсыз жекешелендірілген мүлікті мемлекет меншігіне қайтару бойынша шаралар қолға алынған.

Мәтіннен қате тапсаңыз, бізге жазыңыз