Индонезияда әйелдер мен балаларға қатысты жыныстық зорлық-зомбылыққа байланысты төтенше жағдай енгізілді

Индонезия үкіметі елде әйелдер мен балаларға қатысты жыныстық зорлық-зомбылықтың өршуіне байланысты төтенше жағдай енгізді. Бұл туралы KAZ.NUR.KZ Antara агенттігіне сілтеме жасап хабарлайды.

Әйелдердің мүмкіндіктерін кеңейту және балаларды қорғау министрі Арифа Фаузи төтенше жағдай жариялау туралы хабарлады.

Оның айтуынша, зорлық-зомбылыққа қарсы күрес тек министрліктер мен мекемелер арасындағы ынтымақтастық арқылы мүмкін болады.

"Біз бұл мәселені жалғыз шеше алмаймыз. Өкілеттіктеріміз бен бюджетіміз шектеулі. Дегенмен барлық тараптың бірлескен жұмысы арқылы бұл қиындықтарды еңсере аламыз", - деді министр.

Индонезия халқының жартысына жуығы әйелдер (49,42 пайыз), ал балалар 31,6 пайызды құрайды. Сондықтан, министрдің сөзінше, бұл топтарды қорғау мәселесі ұлттық қауіпсіздік пен тұрақтылық үшін өте маңызды.

Зорлық-зомбылықтың алдын алу және онымен күресудің кешенді шаралары қабылданатыны айтылды. Үкімет тиісті ведомстволармен бірге ресурстарды біріктіріп, зорлық-зомбылыққа ұшырағандарды қорғау және кінәлілерді жауапқа тарту механизмдерін жетілдіруге күш салмақ.