Черногорияда атыстан кейін 3 күндік қаралы күн жарияланды

Черногорияда Цетине қаласындағы атыстан кейін 3 күн қатарынан қаралы күн болады деп жарияланды. Қайғылы оқиғадан 10 адам көз жұмған. Тағы бірнеше кісі жараланды, деп хабарлайды KAZ.NUR.KZ DW агенттігіне сілтеме жасап.

Deutsche Welle хабарлауынша, шарапханада ер адам оқ жаудырып, кейін атысты көшеде жалғастырған. Құрбандар арасында шарапхана иесі мен оның 2 баласы бар.

Қаскөй оқиға орнынан бой тасалап үлгерген, бірақ кейін табылды. Ұстау кезінде ол өзіне қол жұмсамақ болған. Алған жарақатынан ауруханаға апара жатқанда жан тапсырды.

Vijesti телеарнасының мәліметінше, атыс алдында барда төбелес болған. Полиция аталған жағдайға жанжал, кикілжің себеп болғанын айтып отыр. 

Черногория үкіметі жедел отырыс барысында 2, 3 және 4 қаңтарды қаралы күн деп жариялау туралы шешім қабылдады. Медициналық орталықтан тікелей эфирде сөйлеген премьер-министр Милойко Спаич оқиғаны "трагедия" деп атады.