Қытайдағы жер сілкінісінен қаза тапқандар саны 126-ға жетті

Қытайдың оңтүстік-батысындағы Тибет автономиялық ауданында орын алған 6,8 балдық жер сілкінісінен қаза тапқандар саны артып келеді. Бұл туралы KAZ.NUR.KZ Синьхуа агенттігіне сілтеме жасап хабарлайды.

Жаңа келіп түскен мәліметтерге сәйкес, табиғи апат салдарынан 126 адам көз жұмып, тағы 188 адам әртүрлі дәрежеде жарақат алған.

Жойқын зілзала сейсенбі күні таңертең тіркелді.

Жергілікті уақыт бойынша кешкі сағат 19:00-де құтқарушылар мен төтенше жағдайлар қызметі зардап шеккендерге көмек көрсету жұмыстарын жалғастырып жатқаны хабарланды.

Естеріңізге сала кетейік, бүгін таңертең 20 желтоқсанда Непал шекарасына жақын, Қытайдың оңтүстік-батысындағы Тибет автономиялық ауданында магнитудасы 7,1 болатын жойқын жер сілкінісі тіркелді. Жер сілкінісінің ошағы шамамен 10 шақырым тереңдікте болған.

Алғашқы сағаттарда қаза тапқандар саны 53 адам деп хабарланған еді. Алайда кейін бұл көрсеткіш артты. Сонымен қатар жарақат алғандар арасында жағдайы ауыр адамдар бары бірден ескертілді.

Көп ұзамай Қазақстан Президенті Қасым-Жомарт Тоқаев Қытай Халық Республикасының Төрағасы Си Цзиньпинге көңіл айту жеделхатын жолдады.