Билікті күшпен басып алу: Қырғызстан МҰҚК-нің экс-басшысы Ташиевке екі бап бойынша айып тағылды

Жарияланған күні:Бүгін, 30 сәуір 2026, 09:47

МҰҚК экс-басшысы Камчыбек Ташиев — Камчыбек Ташиев. Фото: Откурбека Рахманова/24.kg

Қырғызстанда Мемлекеттік ұлттық қауіпсіздік комитетінің бұрынғы басшысы Камчыбек Ташиевке ресми түрде айып тағылды. Бұл туралы адвокат Икрамидин Айтқұлов мәлімдеді, деп хабарлайды 24.kg сайтына сілтеме жасаған KAZ.NUR.KZ.

Адвокаттың айтуынша, Камчыбек Ташиевке Қырғызстан Республикасы Қылмыстық кодексінің екі бабы бойынша айып тағылып отыр: "Билікті күшпен басып алу немесе ұстап тұру, сондай-ақ конституциялық құрылымды күштеп өзгертуге бағытталған әрекеттер" және "Лауазымдық жағдайын теріс пайдалану". Бұл осы баптың 2 және 4 бөліктеріне қатысты: өзі немесе басқалар үшін пайда мен артықшылыққа ие болу мақсатында немесе басқа жеке мүдде үшін жасалған, сондай-ақ жауапты лауазымды тұлға жасаған әрекет.

Қазіргі уақытта Қырғызстан МҰҚК экс-басшысынан ешқайда кетпеу туралы қолхат алынған. Адвокаттың хабарлауынша, ол кінәсін мойындамайды.

Айта кетейік, бұл істе Ташиевтен бөлек, экс-бас прокурор Құрманқұл Зулушев пен бұрынғы парламент спикері Нұрланбек Тұрғынбек уулуның да аты аталды. Дегенмен, оларға қандай айып тағылғаны әлі белгісіз.

Естеріңізге сала кетейік, биыл ақпанда Камчыбек Ташиев Қырғызстан МҰҚК төрағасы қызметінен босатылған еді. Ташиев бұл өзі үшін күтпеген жағдай болғанын мәлімдеді.

Жақында Жогорку Кенеш депутаты Эльвира Сурабалдиева берген сұхбатында Камчыбек Ташиев мемлекеттік төңкеріс ұйымдастыруға әрекеттенгені үшін қызметінен босатылғанын айтты.

Мәтіннен қате тапсаңыз, бізге жазыңыз