Арыстағы жарылыс: Оқиға орнынан 20 шақырым жердегі жолға артиллериялық снаряд түсті (фото)

Арыстағы жарылыс кезінде болжам бойынша, оқиға орнынан ұшқан артиллериялық снаряд төтенше жағдайдан 20 шақырым жердегі тас жолға түскен. Бұл туралы Vera.kz сайтына сілтеме жасаған KAZ.NUR.KZ хабарлайды.

Басылым күшті соққы салдарынан тас жол жабындысы бүлінген суреттерді жариялады.

Болжам бойынша, бұған әскери бөлімше қоймасынан ұшып шыққан снаряд себепкер.

Тас жолдан бөлек сол сәтте жолда кетіп бара жатқан "Газель" көлігі де зақымданған.

Еске сала кетейік, бүгін, 24 маусым күні таңғы сағат 09:20-да Арыста орналасқан әскери бөлімшедегі қоймада жарылыс болды.

Жарылыс қала тұрғындарын дүрліктіріп, зәресі ұшқан тұрғындар жаппай қаладан кете бастады. Тұрғындар қаладан жаяу және велосипедпен қашып жатыр.

Қорғаныс министрлігі зардап шеккендер жоқ екенін мәлімдеді.

Кейін белгілі болғандай Шымкент қаласының ауруханасына 16-ға жуық зардап шеккен адам дәрігерлік көмекке жүгінген.

Сондай-ақ, Қасым-Жомарт Тоқаев Қорғаныс, Ішкі істер министрліктеріне және Түркістан облысы әкіміне жарылыс зардаптарын жоюды тапсырды.

Қорғаныс министрі оқиға орнына жетті. Жарылыс салдарынан пойыздар уақытынан кешігіп жатыр.

Қала маңында түске жуық тағы бір күшті жарылыс болды. Оны куәгер видеоға түсіріп алған.

Қашқан кезде ата-анасынан адасып қалған балаларды тұрғындар мешітке әкелуде.

Мәтіннен қате тапсаңыз, бізге жазыңыз