Қостанай облысында Ан-2 ұшағы апатты жағдайда суға қонды: әуе кемесінің кімді тасымалдағаны белгілі болды

Кеше Қостанай облысында санитарлық авиацияның ұшағы аударылып қалды. Дәрігерлер ұшақпен миокард инфарктісіне шалдыққан науқасты ауруханаға алып бара жатқан. Бұл туралы облыстық денсаулық сақтау басқармасына сілтеме жасаған KAZ.NUR.KZ хабарлайды.

Ведомство мәліметінше, 3 мамырда сағат 09:04-те медициналық авиацияның электронды поштасына миокард инфарктісі диагнозымен 1964 жылы туған пациентті тасымалдауға өтінім түскен.

"Науқасты "Қостанай облыстық ауруханасы" КМК-на тасымалдау мақсатында сағат 16:09-да құрамында екі ұшқышы, дәрігер мен фельдшері бар санитарлық авиация бригадасы Арқалық қаласы бағытында ұшты.

Болжамды себеп бойынша, ұшу кезінде екпінді желдің салдарынан санавиация борты аударылды", - делінген хабарламада.

Басқарма өкілдері пациент еш жарақатсыз және жағдайы қалыпты күйде "Арқалық өңірлік ауруханасы" КМК-на жеткізілгенін, қазір аурухана жағдайында ем алып жатқанын мәлімдеді.

"Сонымен қатар жарақат алмаған санитарлық авиация бригадасы аурухананың медициналық персоналының қадағалауында және бақылауында.

"АК НАВИГАТОР" ЖШС-мен медициналық авиация желісі бойынша авиациялық қызметтерді сатып алуға арналған шартқа отырғандығын қосымша хабарлаймыз",- делінген облыстық денсаулық сақтау басқармасының хабарламасында.

Еске салайық, бұған дейін Қазақстанның Көлік министрлігі "Навигатор" әуекомпаниясына тиесілі Ан-2 ұшағы әуеге көтерілгеннен кейін күрт төмендеп, тоғанға құлағанын хабарлаған еді.