Ақмола облысында 95 көлік соқтығысты: ТЖМ өкілі апатқа не себеп болғанын айтты

Төтенше жағдайлар министрлігі өкілдері Ақмола облысындағы жолда 95 автокөлік соқтығысуының алдын ала себебін түсіндірді. Бұл туралы KAZ.NUR.KZ Kazinform агенттігіне сілтеме жасай отырып хабарлайды.

"Біздің мәліметіміз бойынша, апатқа көлік тізбегіне ілескендердің жылдамдық режимін сақтамауы себеп болған. Біздің жол-көлік оқиғасының себебін анықтайтын құзіретіміз жоқ. Ішкі істер органдары қазір тергеу жүргізіп, апат себептерін анықтап жатыр", - деді ТЖМ өкілі Магомед Ахриев.

Естеріңізге сала кетейік, 3 қаңтарда Ақмола облысындағы Астана - Шортанды жолында ондаған автокөлік соқтығысып қалған. Полиция жол апатына ауа райының нашарлығы себеп болды деп хабарлаған.

Кейін "ҚазАвтоЖол" Борабайда 95 автокөлік соқтығысқанын мәлімдеген.

Мәліметтерге қарағанда, 11 адам ауруханаға түскен.

Сонымен қатар желіде жол апаты қалай басталғаны түсірілген видео жарияланды.