Ақтөбеде жарылыстан қаза болған азаматтың 70-тен асқан анасы жанайқайын жеткізді

Ақтөбеде жанар-жағармай қоймасында денелері 80-90 пайызға күйіп кеткен екі оператор да көз жұмды. Екі мәйіт те сот-медициналық экспертиза талдамаларына жіберілген деп хабарлайды өңіредгі NUR.KZ тілшісі.

Артында бес баласы қалған жігіттің анасы баласының өліміне сене алмай отырғанын айтты.

"Қайтейін, баламды "енді жоқ" деп жатыр. Сене алмай отырмын. Үлкен мекемеде қуырдақ болып күйіп қалған балама көмектесетін адам табылмағаны ма? Киіздей күйген. Жұмыс жағдайында болды. Енді мына бес баланы кім асырайды? Өліп жатқан 1 жасар бала емес, арыстай азаматым", - дейді марқұмның 72 жастағы анасы Разия Бимағанбетова.

"Sinooil" компаниясында 10 жылдан аса жұмыс істеген 38 жастағы Серікбай Палвановтың бес баласы бар. Барлығы да кәмелеттік жасқа толмаған. Балаларының алды 13-те болса, кішісі 1 жастан енді асқан.

"Отбасымыздың жалғыз асыраушысынан айрылып отырмын. Бес баланың болашағы бар, несиеміз бар... Кішіміз 1 жас алты айда. Дәрігерлер қолдарынан келгенше көмектесті. Ауруханаға әкелгенде-ақ бізге "жақсы хабар айта алмаймыз" деп ескертті", - дейді марқұмның жұбайы Замира Мырзабаева.

55 жастағы екінші оператор Зибагүл Түменбаева бүгін таң ата жансақтау бөлімінде көз жұмған.

Дәрігерлер денелері 80-90 пайызға күйген жұмысшылардың тыныс алу жолдарының да күйіп кеткенін айтады.

Мәтіннен қате тапсаңыз, бізге жазыңыз