Көкшетауда бес жасар бүлдіршін алтыншы қабаттан құлап кетті

Көкшетауда бес жасар бала алтыншы қабаттың терезесінен құлап кетті. Ауыр жарақат алған бүлдіршіннің демі сол жерде үзілген, деп хабарлайды "КТК" арнасы.

Қайғылы жағдай Сарыарқа шағын ауданындағы көпқабатты үйлердің бірінде болған. Қазір оқиғаның мән-жайы анықталып жатыр. Полиция қызметкерлері күн жылына терезесін айқара ашатын уақытта балаларға абай болу керек екенін ескертеді.

"Жазатайым оқиғаны болдырмау үшін бала өмірін сақтап қалатын қауіпсіздік ережелерін қатаң сақтау керек. Ата-аналар баласына қырағы болса, бала қайғылы жағдайға ұшырамайды", - дейді Ақмола облысы полиция департаментінің аға инспекторы Алмагүл Тұрсымбаева.

Дереккөз: "КТК" арнасы

Еске салсақ, бұған дейін ІІМ ата-аналарға үндеу жасап, балаларды терезесі ашық бөлмеде қалдырмауды сұраған еді.

Полиция қызметкерлері жазатайым оқиғалардың алдын алу мақсатында ата-аналарға қарапайым ережелерді ұстануды ұсынған болатын:

• баланы ешқашан терезелері ашық бөлмеде қараусыз қалдырмау;
• тиісті қорғаныссыз москит торларын пайдаланбау;
• бала терезені өздігінен аша алмайтындай етіп терезелерге блокаторларды орнату;
• баланың терезеге шығуына жол бермеу үшін жиһаздың барлық түрін терезелерден алыс қою;
• терезе торларын орнату.