Мәжіліс депутатының баласының коляскасын жағып жіберді деп күдікке ілінген азамат ұсталды

Мәжіліс депутаты Бақытжан Базарбектің пәтерінің алдында тұрған колясканы өртеп жіберді деген күдікпен 32 жастағы азамат ұсталды. Бұл туралы Telegram-дағы ІІМ ресми жаңалықтар арнасы хабарлады.

Естеріңізге сала кетейік, бірер күн бұрын мәжіліс депутаты Бақытжан Базарбек өзінің отбасына қоқан-лоққыға ұқсайтын әрекеттер жасала бастағанын айтқан еді.

Оның сөзінше, белгісіз біреулер Алматыдағы пәтерінің алдында тұрған баласының коляскасын жағып жіберген.

"Осылай, ескі Қазақстанның өкілдері өзінің бар-жоғын ескертіп, білдіртіп отырғандай сезінесің. Не болса да тергеу қорытындысын күтейік", - деп жазған еді депутат желідегі ресми парақшасында.

Бүгін полиция жедел-іздестіру шараларының нәтижесінде аталған қылмыстық құқық бұзушылықты жасады деген күдікпен 1991 жылы туған Б. есімді азамат ұсталғанын хабарлады.

Құзырлы орган мәліметінше, бұл факті Қылмыстық кодекстің 293-бабы бойынша тіркеліп, тергеу амалдары жүргізілуде.

Оқиғаның басқа да мән-жайлары анықталуда.

Мәтіннен қате тапсаңыз, бізге жазыңыз