9 жыл бойы халықаралық іздеуде болған Қазақстан азаматы Түркиядан экстрадицияланды

Бас прокуратура Ішкі істер министрлігімен бірлесіп, Сыртқы істер министрлігінің көмегімен Түркия Республикасынан қылмыстық жауапкершілікке тарту үшін Қазақстан азаматын экстрадициялады. Бұл туралы Бас прокуратура ресми сайтында хабарлады.

Ведомство мәліметінше, Түркияның Әділет министрлігі Қазақстанның Бас прокуратурасының 2014 жылдан бастап халықаралық іздеуде жүрген азамат К-ны ұстап беру туралы сұрау салуын қанағаттандырған.

"Аталған азамат құрылыс компанияларының жалпы сомасы шамамен 1 млрд теңгеге ақша қаражатын жымқырды деп күдіктелуде. Бұл қаражат әлеуметтік мақсаттағы объектілерді салуға арналған. Олардың арасында аурухана болды.

Бүгін Бас прокуратура мен Ішкі істер министрлігінің қызметкерлері Сыртқы істер министрлігінің көмегімен күдіктіні қылмыстық жауапкершілікке тарту үшін Қазақстанға экстрадициялады. Қазіргі уақытта ол Астана қаласының тергеу изоляторына қамалды", - делінген хабарламада.

Ведомство жоғарыда аталған қылмыс үшін күдікті мүлкі тәркіленіп, 5 жылдан 10 жылға дейін бас бостандығынан айырылуы мүмкін екенін атап өтті.

Мәтіннен қате тапсаңыз, бізге жазыңыз