Астана халықаралық әуежайындағы жұмыс жанданды

Астана халықаралық әуежайында өрт шығып, салдарынан бірнеше рейс кешіктірілген болатын. Қазіргі уақытта әуежайдың жұмысы қайта жанданды, деп хабарлайды KAZ.NUR.KZ.

Әуежайдың баспасөз қызметінің хабарлауынша, Астана уақытымен 10:48-де Астана халықаралық әуежайының Т2 Ішкі ұшулар терминалы қолданысқа берілген.

"Ішкі ұшулар терминалында жолаушыларды рейске тіркеу ашылды. Сондай-ақ халықаралық рейстер терминалын іске қосу жұмыстары жүріп жатыр.

Әуежайдағы жұмысты жалғастыру төтенше жағдайлар министрлігінің мамандарының рұқсатымен мүмкін болды", - делінген хабарда.

Сонымен қатар Air Astana компаниясы өкілдері әуежайдың жұмысы қайта жанданып, ұшу кестесін қалпына келтіріліп жатқанын хабарлады.

"Рейстің мәртебесін әуекомпанияның ресми сайтынан тексеруды сұраймыз", - делінген хабарда.

Еске сала кетсек, 27 ақпан таңғы 07:50-де Астана халықаралық әуежайының коммутациялық жүйесінен өрт шыққаны туралы хабарлаған едік. 08:24-те өрт толықтай ауыздықталды.

Осыдан кейін әуежайдан ұшатын 18 рейс кешіктірілген болатын.

Мәтіннен қате тапсаңыз, бізге жазыңыз