ШҚО-да қар көшкіні қайталанды: ТЖМ көпшілікті қауіпсіздік ережелерін сақтауға шақырды

Шығыс Қазақстан облысында тағы да қар көшкіні жүріп өтіп, жолды басып қалды. Бұл туралы төтенше жағдайлар министрлігінің ресми Telegram-каналына сілтеме жасаған KAZ.NUR.KZ хабарлайды.

"ТЖМ "Қазселденқорғау" ММ ақпараты бойынша, Ұлан ауданында облыстық маңызы бар "Өскемен - Самар" тас жолының 100-шақырымында жауын-шашынның мол түсуіне және желдің күшеюіне байланысты жалпы көлемі 750 м3 қар көшкіні өздігінен түсті.

Зардап шеккендер жоқ. Қар көшкіні жолды жауып тастады. Жол қардан жол қызметінің күшімен тазартылды. Қазіргі уақытта жол жүру қамтамасыз етілген", - делінген министрлік хабарламасында.

Осы орайда ТЖМ таудағы қауіпсіздік ережелерін тағы да еске салды:

• Маршрутыңызды егжей-тегжейлі зерттеңіз;
• қар көшкіні, сел қаупі бар жерлерден аулақ болыңыз, әсіресе қатты жауын-шашыннан кейін;
• жақындап келе жатқан сел ағынының шуын естігеннен кейін бірден 50-100 метр жоғары көтерілу керек;
• бұл ретте ұзақ қашықтыққа гүрілдеген, ағыны қатты қар көшкіні мен сел жүру барысында өмірге қауіп төндіретін үлкен салмақты тастардың жан-жаққа ұшырауы мүмкін екенін есте сақтаңыз;
• қар көшкіні мен сел ағынынан тек қашу арқылы құтылуға болатынын ұмытпаңыз;
• 112 бірыңғай нөмірінен келіп түсетін ескертулерді қадағалаңыз, қар көшкіні мен сел қаупі төнген жағдайда тауға баруды кейінге қалдырыңыз.

Еске салсақ, бұған дейін Шығыс Қазақстан облысында қар көшкіні жүріп, облыстық маңызы бар жолды басып қалғанын жазған едік.

Өңірде 2025 жылғы 17-20 қаңтар аралығында облыстың таулы аудандарында көшкін қаупі жарияланды.