Аға журналист

Су басқан Түрген шатқалындағы демалыс аймағынан қанша адам эвакуацияланғаны белгілі болды

Жарияланған күні:Бүгін, 02 шілде 2026, 10:15

су басқан аумақ — Су басқан аумақ. Видеодан кадр: Алматы облысы әкімдігі

Алматы облысында Түрген шатқалындағы демалыс аймақтарынан қанша адам эвакуацияланғаны белгілі болды, деп хабарлайды KAZ.NUR.KZ ТЖМ баспасөз қызметіне сілтеме жасап.

Кеше нөсер жауын-шашын салдарынан Түрген шатқалындағы Түрген өзенінде су деңгейі күрт көтеріліп, соның салдарынан Түрген – Асы автожолының жекелеген учаскелерін су шайып кеткен еді.

ТЖМ мәліметінше, су басқан аймақта 17 киіз үй орналасқан. Сонымен қатар "Водник" бау-бақша серіктестігіндегі төрт аула аумағын су басты. "Қауіпсіздікті қамтамасыз ету мақсатында ТЖМ құтқарушылары 58 адамды, оның ішінде 21 баланы және 8 шетел азаматын эвакуациялады. Эвакуацияланған азаматтар үшін ТЖМ-нің вахталық көлігі ұйымдастырылды. Зардап шеккендер жоқ", - делінген хабарламада.

Оқиға орнында құтқарушылар тәулік бойы жұмыс істеуде, сел қаупі бар жағдайға мониторинг жүргізіліп, авариялық-қалпына келтіру жұмыстары атқарылуда. Жағдай ТЖМ-нің тұрақты бақылауында. Салдарды жою жұмыстарына жалпы ТЖМ, жергілікті атқарушы органдар және өзара іс-қимыл жасайтын қызметтердің 300-ге жуық жеке құрамы мен 44 техникасы жұмылдырылды.

Еске сала кетейік, бұған дейін Алматы облысы Еңбекшіқазақ ауданы әкімдігі су деңгейінің көтерілуі салдарынан "Түрген - Асы" автожолының 25-шақырымындағы жол бөлігін су басқанын хабарлаған еді. Сондай-ақ туристік нысандар мен туристік аймақтарда болған демалушыларды эвакуациялау жұмыстары жүргізіліп жатқаны айтылған.

Мәтіннен қате тапсаңыз, бізге жазыңыз