Жамбыл облысында қызмет бабында қаза тапқан полицей жер қойнына тапсырылды

Жамбылдықтар Қордай ауданында республикалық маңызы бар тасжолда қызметтік міндетін атқару кезінде қаза болған полиция аға лейтенанты Абай Үшкемпірді соңғы сапарға шығарып салды. Бұл туралы KAZ.NUR.KZ ІІМ-нің Polisia.kz ақпараттық медиа-порталына сілтеме жасап хабарлайды.

Порталдың хабарлауынша, жаназаға марқұмның отбасы, ағайын-туыстарымен қатар Жамбыл облысы полиция департаментінің бастығы Бақытжан Малыбаев, Жамбыл облысы әкімінің бірінші орынбасары Нұржан Календеров, бірге қызметте болған әріптестері мен достары қатысты.

Абай Үшкемпір қайтыс болғаннан кейін ІІМ-нің "Құқықтық тәртіпті қамтамасыз етуге қосқан үлесі үшін" медалімен марапатталды. Қоштасу жиынында медаль марқұмның ата-анасына табысталды.

Сондай-ақ Ішкі істер министрі Ержан Саденовтың, Жамбыл облысының әкімі Ербол Қарашөкеевтің қазаға байланысты көңіл айту хаттары оқылды. Олардың қайғыға ортақ екені және марқұмның отбасына мемлекет тарапынан әрдайым қолдау жасалатыны айтылды.

Мәтіннен қате тапсаңыз, бізге жазыңыз