Қазақстанда аналар өлімі бойынша "көш бастап тұрған" өңірлер қандай

Өткен жылы Қазақстанда аналар өлім-жітімінің көрсеткіші 2021 жылмен салыстырғанда 2,6 пайызға азайған. Былтыр аналар өлім-жітімі еліміздің бес өңірінде жиі тіркелген. Бұл туралы KAZ.NUR.KZ тілшісіне Денсаулық сақтау министрлігінің баспасөз қызметі хабарлады.

Денсаулық сақтау министрлігі Ана мен бала денсаулығын сақтау департаментінің дерегінше, 2022 жыл қортындысына сәйкес аналар өлімі бойынша Ұлытау, Атырау, Павлодар, Жетісу және Қызылорда облысы "көш бастап тұр".

"Қайтыс болған аналардың жас шамасына келер болсақ, олардың 47 пайызы - 30-34 жас аралығындағы әйелдер, ал 20 жасқа дейінгі ана өлімінің көрсеткіші 2 пайызды құрайды. Қайтыс болған аналар арасында ең жас әйел 19-да, ал ең үлкен әйел 42 жаста", - делінген ведомствоның портал тілшісіне берген ресми жауабында.

Сондай-ақ Денсаулық сақтау министрлігі қазақстандық әйелдерді соңғы бес жылда контрацепциямен қамту дерегін келтірген.

"Бес жылдық көрсеткішке көз жүгіртсек, контрацепциямен қамтылу деңгейі 2017 жылы - 34,9 пайыз, 2018 жылы -33,1 пайыз, 2019 жылы - 31,1 пайыз, 2020 жылы - 32,0 пайыз, 2021 жылы -35,4 пайызға тең болған. Яғни, елімізде фертильді жастағы әйелдері арасында контрацепцияны қолдану деңгейі соңғы бес жылда бір қалыпты екендігі байқалады. Өкінішке қарай, елімізде контрацепцияны қолдану бір деңгейде сақталуы - халықтың ақпарттардан хабардар болмауы және жауапкершіліктің төмендігінен", - делінген хабарламада.

Сонымен қатар ведомство контрацепциялау деңгейін арттыру мақсатында елімізде отбасын жоспарлау кабинеттері мен Жастар денсаулық орталықтарының жұмысын жақсарту және әйелдерді контрацепциямен қамту бойынша іс-шараларды іске асыру жалғасып жатқанын атап өткен.

Мәтіннен қате тапсаңыз, бізге жазыңыз