Қазақстандық компания Еуроодақтың Ресейге салған санкциясына ілінді

Еуроодақ Ресейдің Украинаға жаппай басып кіруінің екі жыл өтуіне байланысты Ресейге қарсы шектеу шараларының 13-пакетін қабылдады. Санкцияға ілінгендер тізімінде бір қазақстандық компания – "Elem group" ЖШС бар. Бұл туралы KAZ.NUR.KZ Еуроодақ сайтына сілтеме жасап хабарлайды.

"Тізімге электронды компонеттерді сату арқылы Украинаға қарсы агрессиялық соғыста ресейлік әскери-өнеркәсіптік кешенді жанама түрде қолдайтын Ресейден бөлек үшінші елдердегі нақты бір ұйымдар, сондай-ақ Ресейдің әскери-өнеркәсіптік кешеніне электронды компоненттерді әзірлеумен, өндірумен және жеткізумен айналысатын кейбір ресейлік кәсіпорындар енгізілген", - делінген хабарламда.

Тізімде ресейлік компаниялардан бөлек, Өзбекстан, Үндістан, Гонконг, Қытай, Қазақстан, Таиланд және БАӘ-де орналасқан компаниялар да бар.

Айта кетейік, санкцияға ілінген қазақстандық "Elem group" ЖШС бұған дейін АҚШ Сауда министрлігі шектеу енгізген компаниялар қатарына енген еді. Шектеу шаралары былтырғы желтоқсанда енгізілген болатын.

Еске сала кетсек, 23 ақпанда Еуроодақ кеңесі Украинаның аумақтық тұтастығына, егемендігі мен тәуелсіздігіне нұқсан келтіретін немесе қауіп төндіретін әрекеттері үшін жауапты тағы 106 жеке және 88 заңды тұлғаға қатысты шектеу шараларын енгізу туралы шешім қабылдағанын хабарлаған едік.