Тоқаев еңбек ардагері Елеусін Сағындықовпен кездесті

Президент мемлекет қайраткері Елеусін Сағындықовты қабылдады. Олар елдің дамуы жөнінде пікір алмасты. Бұл туралы Ақорда Telegram-дағы ресми арнасында хабарлады.

Мемлекет басшысы Қасым-Жомарт Тоқаев ұзақ жылдар бойы әртүрлі жоғары лауазымды мемлекеттік қызмет атқарған еңбек ардагері Елеусін Сағындықовпен кездесіп, елдің дамуы жөнінде пікір алмасты.

Елеусін Сағындықов президенттің бастамасымен Қазақстанда жүргізіліп жатқан саяси-экономикалық реформаларға қолдау білдірді.

Сондай-ақ мемлекет басшысының биылғы "Әділетті Қазақстанның экономикалық бағдары" атты Қазақстан халқына Жолдауында айтылған негізгі міндеттерді жүзеге асыруға, атап айтқанда өңірлердің дамуындағы басымдықтарды айқындауға, сондай-ақ жергілікті және орталық атқарушы органдардың жұмысын жетілдіруге қатысты ұсыныстарын жеткізді.

"Алаш айнасы" сайтындағы ақпаратқа сәйкес, Елеусін Наурызбайұлы Сағындықов 1947 жылы 1 мамырда Ақтөбе облысында дүниеге келген.

Ақтөбе педагогикалық институтын математика пәнінің мұғалімі мамандығы бойынша, Батыс Қазақстан ауылшаруашылығы институтын инженер-механик мамандығы бойынша тәмамдаған. Ол экономика ғылымдарының докторы.

1992 жылдан 1994 жылға дейін - Қазақстан Республикасы білім министрінің орынбасары.

1994 жылдан 1995 жылға дейін - Ақтөбе облысы әкімінің орынбасары.

1996 жылдан 2002 жылға дейін - Ақтөбе қаласының әкімі.

2002 жылдан - Қазақстан Республикасы Парламенті Сенатының депутаты, Заң шығару және құқықтық реформа жөніндегі комитеттің мүшесі.

2004-2011 жылдары - Ақтөбе облысының әкімі. Жоғарғы Кеңесінің 13-ші шақырылым депутаттығына кандидат.

2012 жылдан бастап Ақтөбе облысынан сайланған Қазақстан Республикасы Парламенті Сенатының депутаты, Экономикалық даму және кәсіпкерлік комитетінің мүшесі.

Мәтіннен қате тапсаңыз, бізге жазыңыз