Вьетнам Компартиясының бас хатшысы астаналық сәбидің тұсауын кесті (фото)

Қасым-Жомарт Тоқаев пен Қазақстанға мемлекеттік сапармен келген Вьетнам Коммунистік партиясы Орталық комитетінің бас хатшысы То Лам Астанадағы "Этноауыл" көрмесін аралады. То Лам "Этноауылда" cәбидің тұсауын кесті, деп хабарлайды Ақорда.

Астанаға мемлекеттік сапармен келген Вьетнам Коммунистік партиясы Орталық комитетінің Бас хатшысы То Лам қазақ халқының мәдени мұрасын таныстыратын "Этноауыл" көрмесіне барды.

Мәртебелі меймандар төл тарихымызды танытатын, соның ішінде ұлтымыздың киім үлгілері, қолөнері, әдет-ғұрпы мен саятшылық дәстүрі, музыкалық аспаптары, кескіндемесі және халық ойындары көрсетілген бірнеше тақырыптық аймақты тамашалады.

Экспозицияның әр бөлігі дала өркениетінің ерекшеліктерін паш етеді.

Айта кетерлігі, Вьетнам Коммунистік партиясы Орталық комитетінің бас хатшысы То Лам "Этноауылда" cәбидің тұсауын кесіп, оның өмірлік жолы ашық болуына тілектестік білдірді.

Еске сала кетейік, бүгін, 7 мамырда Вьетнам компартиясының бас хатшысы Астанадағы әскери парадты тамашалады.