Тоқаев Германия президентіне көңіл айтты

Қасым-Жомарт Тоқаев Германия президенті Франк-Вальтер Штайнмайерге Магдебургтегі қайғылы оқиғаға байланысты көңіл айту жеделхатын жолдады. Бұл туралы KAZ.NUR.KZ Ақордаға сілтеме жасап хабарлайды.

Қасым-Жомарт Тоқаев Магдебург қаласындағы жәрмеңкеде орын алған жантүршігерлік оқиға салдарынан бірнеше адамның қаза табуына байланысты Германия Федеративтік Республикасының Федералдық Президенті Франк-Вальтер Штайнмайерге көңіл айтты.

"Достас герман халқының ауыр қайғысына ортақтасып, еліміздің және өз атымнан марқұмдардың туған-туыстарына көңіл айтамын. Сондай-ақ зардап шеккендердің тезірек сауығып кетуіне тілектестік білдіремін", - деп жазылған жеделхатта.

20 желтоқсан күні Германиядағы Магдебургте көлік рождестволық базардағы бір топ адамды қаққанын еске саламыз. "Лаңкестік акт" деп бағаланған қайғылы оқиға салдарынан 80-нен астам адам жарақат алды.

"Би-би-си орыс қызметінің" хабарлауынша, соңғы мәліметтерге сенсек, кемінде төрт адам қаза тауып, он адам жараланған. Алдын ала болжам бойынша, жүргізуші 2006 жылдан бері Германияда тұратын Сауд Арабиясының тумасы. Апаттан кейін ол бірден ұсталды.

Мәтіннен қате тапсаңыз, бізге жазыңыз