"Кіммен сырласам, кімге еркелеймін": Ернар Айдар марқұм әкесі туралы жантебірентер жазба жариялады (видео)

Танымал әнші Ернар Айдар желідегі парақшасында марқұм әкесін еске алып, жантебірентер жазба жариялады. Бұл туралы KAZ.NUR.KZ хабарлайды.

"Жаным әке.... Барлық жұмысымды әкеммен ақылдасатынмын, себебі әкем жан-жақты турасын айтатын. Әкеммен ақылдасу, маған үлкен шабыт, сенімділік сыйлайтын. Барлық ән кешімнің алдында, үйде әкеме кішігірім концерт қойып беретінмін. Әкем сонда әндерімнің, киімдерімнің, сөйлейтін сөздерімнің артық-кемін айтып, ақ батасын беретін еді.

"Ерошым балам, көзіңе қара, асып-тасыма, тәкәппарланба, сахнада жақсылап, жарқырап өнер көрсет" дейтін. Әке, маған осы сөздерді енді кім айтады? Кіммен сырласам, кіммен ақылдасам, кімге еркелеймін, кімге бала болып мақтанам, кімге......? Қапыда ерте кеттіңіз-ау. Әкешім, сағындым сізді. Алланың бұйрығын қабылдайды екенсің, көнеді екенсің, бірақ өте қиын екен.....", - деп сағыншын жеткізді Ернар Айдар Instagram желісіндегі парақшасында.

Сондай-ақ эстрада жұлдызы әсерлі жазбасында марқұм әкесіне өлең жолдарын да арнап, анасының, жақындарының, барша халықтың амандығын тілеген.

Естеріңізге сала кетсек, Ернар Айдар былтыр желтоқсанда әкесі Айдарұлы Жаңабайдың өмірден өткенін хабарлаған еді. Кейін ол желіде әсерлі жазба жариялап, марқұм әкесін есіне алды.