"Басымды талай тексерістен өткіздік": Жұлдыз Әбдікәрімова жаз бойы ауруханадан көз ашпаған
Опубликовано:
Отандық актриса Жұлдыз Әбдікәрімова былтыр жаз бойы басы қатты ауырғаннан ем таппай, ауруханадан көз ашпаған күндерін еске алып, жазба жариялады, деп хабарлайды KAZ.NUR.KZ.
"2024 жылы жаз бойы ауруханадан көз ашпадым. Басым қысып ауыратыны сонша, тыныс алудың өзі азап болатын. Дәрігерлер себебін таппай менімен бірге әбден қиналды. Басымды талай тексерістен өткіздік. Тауға да, тасқа да ұрдым деген осы шығар", - деп ауыр күндерді есіне алды актриса Instagram парақшасында.
Ол басына түскен қиындықтар мұнымен бітпегенін айтып, жұмыстан кету себебіне қатысты ағынан жарылды.
"Былтырғы сот мәселесі әбден қажытып, жұмыстан қол үздім. Ең алдымен "Хабар" арнасындағы "Оян" бағдарламасынан кеттім. Соңғы күндері көңілімді бағып, алаңдап екі ұл жұмысыма бірге келетін болды. Эфирде көрерменді алдай алмайсың. Сол себепті өз еркіммен жұмыстан кету үшін арыз бердім", - деп жазды Жұлдыз.
Еске сала кетейік, Жұлдыз Әбдікәрімова былтыр қазан айында құрылыс компаниясын сотқа бергенін хабарлады. Актриса үш жыл бұрын сатып алған үйінің құжаттарын әлі күнге дейін ала алмай жүргенін айтты.
Сол арада танымал журналист Дана Нұржігіт үйінен айырылып, әлі күнге пәтер жалдап тұратын актриса Жұлдыз Әбдікәрімоваға қолдау білдіріп жазба жариялады.
Мәтіннен қате тапсаңыз, бізге жазыңыз
Оригинал статьи: https://kaz.nur.kz/showbiz/incidents/2217189-basymdy-talai-tekseristen-otkizdik-zhuldyz-abdikarimova-zhaz-boiy-auruhanadan-koz-ashpagan/