Желі арқылы танылған Мұрат Әбділдә бостандыққа шықты (видео)

Бүгін, 9 қыркүйекте көпшілікке әлеуметтік желі арқылы танылған Мұрат Әбділдә бостандыққа шықты. Бұл туралы KAZ.NUR.KZ хабарлайды.

Блогердің бостандыққа шыққанын актер, әзілкеш Мансұр Орынхан Instagram-дағы парақшасында мәлімдеп, видео жариялады.

"Мұрат Әбділдә Алланың қалауымен түрмеден шықты. Барша қолдаушыға көп рақмет!" - делінген жазбада.

Видеода айтылған ақпаратқа сәйкес, блогер бостандыққа шықпас бұрын судьяның алдында енді желіде бейәдеп сөздер айтпауға уәде берген.

Сондай-ақ Әбділдә өзін қолдап келген қазақ халқына алғысын білдірді.

"Аллахтың қалауымен, сіздердің, көпшіліктің дұға тілектеріңізбен мен 2024 жылғы 9 қыркүйекте бостандыққа шықтым. Рақмет сіздерге! Қобалжып тұрмын", - деді блогер.

Қолданушылар жазба астында жылы лебіздерін білдірген:

"Король қайтып оралды!", "Анасы қуанып қалды-ау", "Тиктоктың легендасы кім десе, мен тек осы азаматты айтар едім", "Жарайсыңдар, жігіттер! Қолдап барғандарың жақсы болған екен", "Енді мықты тректер күтеміз", - деп жазды олар.

Айта кетсек, Мұрат Әбділдә былтыр 4,5 жылға бас бостандығынан айырылған болатын. Бұған дейін блогердің мерзімінен бұрын бостандыққа шығуы мүмкін екенін жазған едік.

Мәтіннен қате тапсаңыз, бізге жазыңыз