"Қатаңдатылған карантин енгізілуі мүмкін": Цой 2021 жылға жасалған болжамды ұсынды

Денсаулық сақтау министрі Алексей Цой үкіметтің кеңейтілген отырысында 2021 жылдың соңына дейінгі эпидемиологиялық ахуалға қатысты жасалған болжамды ұсынды деп хабарлайды KAZ.NUR.KZ тілшісі.

Оның сөзінше, эпидемияның шарықтау шегі наурыз айының соңында болуы мүмкін. Оптимистік сценарий бойынша тәулігіне 3 мың адамға дейін вирус жұқтыруы, төсек-орын қорының сыйымдылығы 24 мыңға дейін жетуі ықтимал.

"Пессимистік сценарий бойынша күніне тіркелгендер 9 мыңға дейін жетуі мүмкін. Төсек сыйымдылығы 45 мың кереуетке жетеді. Шамадан тыс жүктемені болдырмау үшін қатаңдатылған карантин енгізілуі мүмкін. Бірінші жартыжылдықта 2 миллион адамға жасалған вакцинация жұқтыру көрсеткішін 40 мың жағдайға дейін азайтуға көмек береді деп болжануда", - дейді Цой.

"Бұл мәселе бойынша тек Денсаулық сақтау министрі ғана емес, әкімдердің бәрі мына жайды ескеруі керек: жалпыға ортақ вакцинация - өте маңызды мәселе. Бізге азаматтарды вакцинациядан өткізуде өте салмақты, ойластырылған, қыр-сыры ескерілген жоспар керек. Дүрбелең болмас үшін ол салада ескеретін өте көп нюанс бар. Вакцинация эпидемиологиялық ахуалды түзеуі керек. Алда жұмыс көп", - деді Қасым-Жомарт Тоқаев.

Еске сала кетсек, президенттің қатысуымен үкіметтің кеңейтілген отырысы өтіп жатыр.

Онлайн форматта өтіп жатқан отырыс барысында елдің 2020 жылғы әлеуметтік-экономикалық дамуының қорытындылары шығарылып, алдағы кезеңге арналған жоспарлар қарастырылады.