Шымкентте Тұрар Рысқұловтың ескерткішіне маска тағып қойған

Қазақтың мемлекеттік қайраткері әрі саясаткер Тұрар Рысқұловтың Шымкенттегі Жібек жолы көшесінде орналасқан ескерткішіне маска тағып қойған деп хабарлайды Otyrar.kz.

Ескерткішке нақты кімнің маска тағып қойғаны белгісіз. Мұны істеуге қанша уақыт кеткені де беймәлім.

Өйткені тұғырын есептемегенде Тұрар Рысқұловтың ескерткішінің биіктігі 4,5 метр. Ол Шымкенттегі ең биік ескерткіштердің бірі саналады.

Басылымның жазуынша, ескерткішті коронавирустан қорғағысы келгендердің біраз тер төгуіне тура келген.

Айта кетсек, ескерткіш 2009 жылы қойылған. Жоба авторлары әрі орындаушылары - Насыр Рүстемов пен Дәурен Әлдеков. Алып ескерткіш кәсіпкерлердің есебінен орнатылып, оған 15 млн теңге жұмсалған.

Еске сала кетсек, 5 сәуір күні Шымкент қаласы полиция департаментінің алдына бірнеше журналист жиналып, құқық қорғаушылардан БАҚ қызметкерлерінің құқығын сақтауды талап еткен. Жиналғандарға полиция департаментінің басшысы Ералы Жұмаханбетов шыққан еді.

"Астана" телеарнасының Шымкенттегі меншікті тілшісінің сөзінше, тәртіп сақшылары түсірілімдердің бірінде жұмысына кедергі келтірген. Осылайша, БАҚ өкілдері журналистердің құқығын қорғауға назар аударуды талап еткен болатын.

Бұл талап Шымкенттің бас полицейі Ералы Жұмаханбетовтың назарынан тыс қалмады. Генерал БАҚ өкілдерінің алдына шығып, әрбір өтініштің қаралатынын айтты.

Мәтіннен қате тапсаңыз, бізге жазыңыз