Қайрат Боранбаевты қамауда ұстау мерзімі тағы бір айға ұзартылды

Бизнесмен Қайрат Боранбаевты қамауда ұстау мерзімі тағы бір айға ұзартылды, деп хабарлайды Нұр-Сұлтан қаласының соты ресми сайтында.

"2022 жылғы 8 шілдеде Нұр-Сұлтан қаласының мамандандырылған ауданаралық тергеу соты күдікті Қ.С. Боранбаевқа қатысты белгіленген күзетпен ұстау түріндегі бұлтартпау шарасының мерзімін 1 айға ұзартты", - делінген хабарламада.

Айта кетейік, бұған дейін де Қайрат Боранбаевты қамауда ұстау мерзімі ұзартылған болатын.

Бизнесмен биылғы жылдың наурыз айында ұсталған еді.

Қаржылық мониторинг агенттігінің мәліметінше, ведомство қазіргі таңда квазимемлекеттік секторда аса ірі көлемде қаражат жымқыру фактісі бойынша қылмыстық істі тергеп жатыр. Аталған қылмысты жасады деген күдікпен Қайрат Боранбаев ұсталған.