ІІМ Көші-қон қызметі Қазақстанға келіп жатқан Ресей азаматтарының артуына байланысты үндеу жасады

Қазақстанға келіп жатқан Ресей азаматтарының артуына байланысты еліміздің Ішкі істер министрлігінің Көші-қон қызметі ресми мәлімдеме жасады, деп хабарлайды polisia.kz.

ІІМ Көші-қон қызметі комитеті төрағасының м.а. Аслан Аталықовтың айтуынша, Қазақстанда мигранттардың келуі мен елде жүруі Көші-қон қызметінің бақылауында және шетелдіктердің Қазақстанда болу тәртібі заңмен реттеледі.

"Бірде-бір шетел азаматы көші-қон заңнамасының талаптарын орындамай, мемлекетіміздің аумағында болуға құқығы жоқ. Еуразиялық экономикалық одаққа мүше мемлекеттердің азаматтары үшін Қазақстан Республикасында болудың рұқсат етілген мерзімі мемлекеттік шекарадан өткен күннен бастап, ортақ ереже бойынша 90 күннен кейін аяқталады.

Мигранттарды тіркеуді ішкі істер органдары қабылдаушы тараптардың мәліметтері мен Қазақстан Республикасының Ұлттық қауіпсіздік комитетінің шетелдіктердің кіруі мен шығуын есепке алатын Мемлекеттік шекара арқылы өткізу пункттерінен бірыңғай дерекқорға уақытылы түсетін мәліметтері негізінде жүзеге асырады.

Статистикаға сүйенсек, биыл Қазақстанға 4,3 млнға жуық шетелдік келсе, 4,1 млн кеткен, оның ішінде 1 660 000 Ресей Федерациясының азаматтары келген және 1 640 000 кеткен. Олардың елде уақытша жүруі есепте. Әрқайсысының төлқұжат деректері мен елген кірген күні, олар туралы толық ақпарат бар", - дейді Аслан Аталықов.

Оның сөзінше, көші-қон процестеріне мониторинг жүргізіліп отырады. Ішкі істер органдары келушілердің елде белгіленген уақытта болу ережесінің сақталуын бақылауда ұстайды.

"Шетелдiктiң елде болу мерзiмi аяқталса, оған қатысты заңда көзделген шаралар қолданылады. Бақылау барысында көші-қон заңнамасын бұзған 45 700 адам әкімшілік жауапкершілікке тартылып, оның 4200-і мәжбүрлі түрде Қазақстаннан шығарылды. Оның ішінде көші-қон заңнамасын бұзған 3200 ресейлік жауапқа тартылды. Бұл елге келген Ресей Федерация азаматтарының нөл бүтін оннан екі пайызын құрайды. Бұл статистика олардың Қазақстанда болу шарттарын сақтау тәртібін көрсетеді", - дейді Аслан Аталықов.

Ведомство өкілі егер шетелдік ережені бұзса, оған Қазақстаннан мәжбүрлеп шығару шарасы қолданылып, елімізге қайта кіруіне 5 жыл мерзімге дейін тыйым салу түріндегі қосымша санкция қарастыралатынын атап өтті.

"Сол сияқты ішкі істер органдары шетелдіктердің Қазақстанда болу тәртібінің сақталуын уақытша тұруға берілген рұқсат негізінде бақылайды. Уақытша тұруға рұқсат - шетелдiкке Қазақстан Республикасының заңында көзделген еңбек шарты, оқу, емделу және басқа да жан-жақты негiздерде беріледі.

Көшi-қон қызметi олардың тұрғылықты мекенжайы, тұрғын үйдің иесі және онда тұратын шетелдіктер туралы толық ақпарат бойынша иммиграциялық бақылауды қамтамасыз етеді.

Шекараны заңсыз өту, ел аумағында тіркеу үшін құжаттарды ресімдеу тәртібін бұзу сынды кез келген жағдай Қазақстан Республикасының заңнамасына сәйкес реттеледі. Қазақстан Республикасының Көші-қон қызметі штаттық режимде жұмыс істеуде. Шетелдіктердің, уәкілетті мемлекеттік және құқық қорғау органдарының заңдылықты сақтауын бақылау жүзеге асырылуда", – дейді Аслан Аталықов.

Айта кетейік, бұған дейін еліміздің Ұлттық қауіпсіздік комитетінің Шекара қызметі Қазақстан-Ресей шекарасында Қазақстанға кіріп жатқан шетел азаматтарының саны артқанын хабарлаған еді.