Мейіржан Төребаевты қамауда ұстау мерзімі тағы бір айға ұзартылды

Танымал актер әрі блогер Мейіржан Төребаевты қамауда ұстау мерзімі ұзартылды. Ол 18 қарашаға дейін темір торда болады, деп хабарлайды KAZ.NUR.KZ Алматы қалалық сотының баспасөз қызметіне сілтеме жасап.

18 қазан күні сот қаулысы шықты. Онда тергеу органдарының күдікті Төребаевтың қылмыстық іс материалдарымен танысу кезеңінде тағы бір айға, яғни 18 қарашаға дейін қамауда болу мерзіміне санкция беру туралы өтініші қанағаттандырылды.

Баспасөз қызметі қаулы әлі заңды күшіне енбегенін атап өтті.

Еске салайық, биыл ақпан айында блогерлер Мейіржан Төребаев пен Мейірхан Шерниязов Mudarabah Capital қаржы пирамидасын құрды деп күдіктенген болатын.

20 сәуірде олар 10 күнге қамауға алынды, содан кейін қамауға алу мерзімі екі айға ұзартылды. Кейінірек, 18 маусымда Төребаев пен Шерниязовты тұтқындау тағы екі айға ұзартылды. Қыркүйек айында блогерді қамауда ұстау мерзімі тағы бір айға ұзартылды.