Арыстанбек Мұхамедиұлының ісі бойынша басты сот талқылауы қашан өтетіні белгілі болды

Бюджет қаражатын жымқырды деп айыпталып жатқан Ұлттық музейдің бұрынғы директоры Арыстанбек Мұхамедиұлы мен өзге де тұлғаларға қатысты сот отырысы қашан өтетіні белгілі болды. Бұл туралы Facebook-тегі Астана соттары ресми парақшасында хабарланды.

Белгілі болғандай, экс-министр мен өзге де фигуранттарға қатысты қылмыстық іс Астана қаласының Байқоңыр ауданының № 2 сотына келіп түскен.

"Қылмыстық іс бойынша басты сот талқылауы 2023 жылғы 17 сәуір сағат 10:00-ге белгіленді. Сот отырыы ашық форматта өтеді", - делінген хабарламада.

Арыстанбек Мұхамедиұлынан бөлек, бюджет қаражатын жымқырды деп айыпталып жатқандардың қатарында Нұразхан А.Ш., Көшенов А.К. және Сәдуақасаова А.Т бар.

Еске салайық, 2022 жылғы мамырда Сыбайлас жемқорлыққа қарсы агенттік Ұлттық музей басшылығы мемлекеттік сатып алу туралы шарт аясында бюджет қаражатын (146 миллион теңге сомасында) жымқыру белгілері бойынша күдікке ілінгенін хабарлаған болатын.

Екі аптадан кейін Ұлттық музейдің сол кездегі директоры, бұрынғы Мәдениет және спорт министрі Арыстанбек Мұхамедиұлына қатысты "күзетпен ұстау" бұлтартпау шарасы таңдалғаны оның екі айға қамауға алынғаны белгілі болды.

Содан бері Арыстанбек Мұхамедиұлын қамауда ұстау мерзімі бірнеше рет ұзартылды.

Сондай-ақ Антикор қылмыстық іске қатысты жаңа мәліметтерді бөліскен болатын.

Мәтіннен қате тапсаңыз, бізге жазыңыз