Медеудегі өртті сөндіру кезінде көз жұмған Арслан Құрманбеков ІІІ дәрежелі "Айбын" орденімен наградталды

Қызметтік борышын өтеу кезінде қаза тапқан Арслан Құрманбеков ІІІ дәрежелі "Айбын" орденімен наградталды, деп хабарлайды Ақорда Telegram-дағы ресми арнасында.

"Мемлекет басшысының жарлығымен қызметтік борышын атқаруда көрсеткен батылдығы мен жанқиярлығы үшін Төтенше жағдайлар министрлігінің Алматы қаласы Төтенше жағдайлар департаменті өрт сөндіру және авариялық-құтқару жұмыстары қызметі №7 өрт сөндіру бөлімінің аға өрт сөндіруші-құтқарушысы Арслан Жолдасбекұлы Құрманбеков ІІІ дәрежелі "Айбын" орденімен наградталды (марқұм)", - делінген хабарламада.

Арслан Құрманбеков - азаматтық қорғаныс сержанты. Ол 1994 жылы 23 тамызда Алматы облысы Талғар ауданы Талғар қаласында дүниеге келген.

Еңбек жолын Алматы қаласы ТЖД "ӨСжАҚЖҚ" ММ №9 мамандандырылған өрт сөндіру бөлімінде өрт сөндіруші-құтқарушы ретінде бастаған.

Кейін Алматы қаласы ТЖД "ӨСжАҚЖҚ" ММ №1 өрт сөндіру бөлімінде өрт сөндіруші, аға өрт сөндіруші-құтқарушы болып қызмет атқарған.

2019 жылы Алматы қаласы Төтенше жағдайлар департаментінің өрт сөндіру және авариялық-құтқару жұмыстары қызметі №7 өрт сөндіру бөлімінің аға өрт сөндіруші-құтқарушысы қызметіне келген.

Биыл 8 мамырда Арслан Құрманбеков Іле-Алатау табиғи паркінің тау бөктеріндегі өртті сөндірген жедел топтың құрамында қызметтік борышын атқарып жүріп, қайғылы жағдайда қаза тапты.

Алматы қалалық ТЖД Арслан Құрманбековтің мұрагерлеріне оның 60 айлық қаражаты (5 жылғы) - шамамен 13 млн теңге мөлшерінде біржолғы өтемақы төленетінін хабарлаған болатын.