Ақтөбе облысында тек 22 бала баратын мектепте әр түрлі жастағы оқушылар бір сыныпта білім алуда

Ақтөбе облысы Байғанин ауданы Қопа ауылының тұрғыны мектептегі білім сапасына шағымданды. Айтуынша, Ақтан жырау мектебіндегі 1 сынып оқушысы үлкен сыныптың балаларымен бір кабинетте оқуға мәжбүр. 5-8 сынып оқушылары дәл осындай жағдайда білім алуда, деп жазады KAZ.NUR.KZ тілшісі.

Төрт сыныптың әр түрлі жастағы оқушылары орыс тілі, ағылшын тілі, тарих сабақтарын бірге оқиды.

"Қопа ауылындағы Ақтан жырау негізгі мектебінде 1-4 сынып, 5-8 сынып оқушылары бірігіп оқиды. Қазіргідей дамыған заманда ауыл мектебіндегі 5-8 сынып оқушылары орыс тілі, ағылшын тілі пәндерін бір кабинетте оқып жатыр. Балаларға жаным ашиды. Ол жерде қандай білім бар?!", - дейді аты-жөнін жасырын қалдыруды сұраған ауыл тұрғыны.

Ақтөбе облыстық білім басқармасының басшысы Нұргүл Бертілеуова аталған жағдайды растап отыр.

"Бұл - шағын жинақты мектеп. Онда бала саны өте аз. Қазір 22 бала оқиды. Ол негізгі мектеп болғандықтан, бала саны 41-ден жоғары болуы керек. Мектепте бала аз болса да, ұстап отырмыз. Бюджеттен қаржыландырылады. Бұл қолданыстағы заңнамаға қайшы емес. 1-4 сынып, 5-8 сынып және 9-сынып бар. Яғни барлығы үш сыныпқа бірігіп оқиды. 5-8 сынып аралығында бар болғаны 6 бала оқиды. Сол 6 бала бір сыныпқа біріктірілген. Ал сыныпта 25 баладан жоғары болуы керек. Сондықтан да пәндер біріктіріліп оқытылады", - дейді Нұргүл Бертілеуова.

Білім басқармасы өкілінің хабарлауынша, Ақтөбеде осындай 204 мектеп бар. Онда 14 мыңға жуық бала оқиды. Кейбір мектептерде бар-жоғы бес оқушы ғана бар көрінеді.

"Бізде бір мектептегі балалар саны бесеуден басталатын мектептер бар. Мектеп болмаса ауылды ұстап тұру мүмкін емес. Сондықтан 5 бала болсын, 10 бала болсын мектепті жаппай отырмыз. Ақтөбенің барлық ауданында дерлік 5-ақ бала оқитын мектептер бар. Бала саны аз, сабақтар кіріктірілген. Ондай мектептерде сағат саны аз. Мұғалім де бара бермейді. Бір адам бірнеше пәнді қатар береді. Солай оқытылады", - дейді облыстық білім басқармасының басшысы.

Автор: Ардақ Ерубаева