Әнші Рахат Тұрлыханов әйеліне қол көтергені үшін қайтадан сот алдына келді

Бүгін Алматы қалалық сотында бұған дейін әйелін ұрып-соққаны үшін ескерту алған Рахат Тұрлыхановтың ісі бойынша апелляциялық сатының отырысы өтті, деп хабарлайды KAZ.NUR.KZ тілшісі.

Отырыс кейбір БАҚ өкілдерінің сот процесін суретке түсіруімен басталды, бұл судьяның наразылығын тудырды.

Сәлден кейін тараптардың өтініші бойынша журналистерден сот залынан мүлде шығып кетуін өтінді. Рахат Тұрлыхановтың өзі, оның әйелі және қорғаушысы сот отырысын жабық өткізуді сұрады. Прокурор да бұл өтінішті қолдады.

Сол жерде судья өтінішті қанағаттандыру туралы шешім қабылдады. Сол себепті отырыс бұқаралық ақпарат құралдарының қатысуынсыз өтетін болды.

Еске салсақ, 2024 жылғы 9 қаңтарда Алматы қаласының әкімшілік құқық бұзушылық жөніндегі мамандандырылған ауданаралық сотында Рахат Тұрлыхановқа қатысты ӘҚБтК-нің 73-2-бабының 1-1 бөлігі бойынша әкімшілік іс қаралғаны туралы ақпарат тарады. Ол жұбайын ұрды деп айыпталған.

Алматыда бұл дерек бойынша сот отырысы өтті, алайда тараптар татуласып, іс тоқтатылған. Тұрлыхановқа ескерту түріндегі жаза белгіленген.

10 қаңтарда әнші мен әйелі Алтынай болған жайтқа қатысты видео үндеу жариялап, көпшілікке мән-жайды түсіндірді.

Алайда көп ұзамай Тұрлыхановтың ісі бойынша сот кабинетінде апелляциялық шағым пайда болды. Порталға апелляциялық шағым 2024 жылғы 10 қаңтарда түскен, кейін судьяға берілген. Бірақ шағымды қай тарап бергені құпия болып қалған еді.

Кейін апелляциялық шағымды прокурорлар түсіргені мәлім болды.