Жарықсыз қалған ақтөбеліктер жолды жауып тастады (видео)

Ақтөбеде қала әкімі жолды жауып тастаған Кірпішті тұрғын алабы аумағындағы бау-бақша ұжымдарының, Ясный елдімекенінің тұрғындарымен кездесті. Бұл туралы әкімдікке сілтеме жасаған KAZ.NUR.KZ хабарлайды.

"Қатты жел мен боран салдарынан қалаға қарасты бірқатар бау-бақша ұжымында электр жарығы сөнді. Кірпішті тұрғын алабының аумағындағы бау-бақша ұжымдарының, Ясный елді мекенінің учаскелерінің тұрғындарымен қала әкімі Азамат Бекет барып кездесті", - делінген хабарламада.

Әкімдіктің хабарлауынша, қала басшысы трансформаторлық станцияларға электрші мамандармен бірге барып, жұмысты тұрғындармен бірге бақылаған.

Сондай-ақ қазір қала бойынша "Энергосистема" жауапкершілігі шектеулі серіктестігінің 20 бригадасы электр тарату желілерінің үзілген учаскелерін жөндеп жатқаны мәлім болды.

7 ақпан күні Ақтөбенің әкімі жел екпінінің күшеюі салдарынан кейбір бау-бақшаларда электр жарығы сөнгенін, "Энергосистема" мекемесі жөндеу жұмысын жүргізіп жатқанын хабарлаған.

Бұған қоса ақтүтек боранда шақыртуға шыққан ақтөбелік фельдшерлер діттеген жерге еңбектеп жеткені туралы жазған едік.