Аягөзде боранда жоғалған 8 жасар бала табылды

Абай облысында боранда жоғалып кеткен сегіз жасар бала табылды, деп хабарлайды Қазақстанның Төтенше жағдайлар министрлігіне сілтеме жасаған KAZ.NUR.KZ.

"Бала Аягөз қаласының шегінде, қаланың шет жағынан табылды, медициналық көмек қажет болған жоқ. ТЖД бөлімшелері тұрақты орналасу орындарына қайтады", - деп хабарлады ТЖМ өзінің Telegram-арнасында.

Ішкі істер министрлігі салт атты баланы іздеу жұмыстары қалай жүргенін баяндады.

"11 ақпанда сағат 18.00 шамасында Аягөз ауданының полиция бөліміне жергілікті тұрғындар кәмелетке толмаған 2015 жылы туған ұлын іздеуге жәрдемдесу туралы өтініш білдірді. Өздеріңіз білетіндей, бала атқа мінген.

Баланы іздеу дереу басталды, полиция бөлімінің барлық жеке құрамына дабыл қағылды. Полицейлерден басқа Аягөз қаласында орналасқан әскери бөлімдердің әскери қызметшілері, төтенше жағдай қызметкерлері, еріктілер және ауданның қамқор тұрғындары іздеуге белсенді қатысты. Жағдай ішкі істер министрінің ерекше бақылауында болды", - делінген Polisia.kz хабарында.

Іздеу іс-шаралары 4 сағаттан астам жүргізіліпті, ауа-райы жағдайлары жедел-іздестіру іс-шараларын қиындатыпты. Баланы іздеуге 100-ден астам адам қатысты.

"Іс-шаралар полиция мен құтқарушылардың арнайы көліктерінде өткізілді, өтуге қиын жерлерде адамдар қарда жүретін көліктермен және жылқылармен жүрді. 5 дрон көтерілді", - дейді полицейлер.

Тәртіп сақшылары жергілікті тұрғындармен бірге елді мекеннің шетінде баланы кездестірді. Боранның кесірінен бала бағдарсыз болыпты. Боранның құлдырауынан кейін ол іздегендердің шамдарын көріп, осы бағытта жүре бастаған.

"Қазіргі уақытта бала ата-аналарға тапсырылды. Оның денсаулығына ешқандай қауіп төніп тұрған жоқ.Баланы іздеуге қатысқандардың барлығына алғысымды білдіремін"- деп хабарлады ПД бастығы Сұлтан Бектөре.

Бұған дейін Абай облысы Аягөз қаласында жоғалып кеткен 2015 жылы туған баланы іздестіру жұмыстары жүріп жатқаны хабарланған еді.