"Барлық дерлік өтініші қанағаттандырылмады": Бишімбаевтың ісі бойынша қандай шешім қабылданды

Астана соты Қуандық Бишімбаевтың ісі бойынша қорғаушылардың өтініштері бойынша қабылданған шешімдерді жариялады. Алдын ала сот тыңдауында айыптау қорытындысының көшірмесін інісінің қорғаушыларына беру талабы ғана қанағаттандырылды, деп хабарлайды NUR.KZ тілшісі.

Қуандық Бишімбаевтың ісі бойынша қорғаушылардың өтініштері бойынша келесі шешімдер қабылданды:

• Сот қорғаушының қылмыстық істі прокурорға қайтару, Бишімбаевқа қатысты қылмыстық қудалауды тоқтату және Бишімбаевтың әрекетін қайта саралау туралы өтінішін қанағаттандырусыз қалдыру керек деп есептейді.
• Сот қорғаушының құжаттар мен нақты деректерді дәлелдеме ретінде жол берілмейтін деп тану және оларды дәлелдемелерден алып тастау туралы өтініші мерзімінен бұрын айтылған және қанағаттандырудан бас тартуға тиіс деп санайды.
• Қорғаушылардың Нүкеноваға қайта сараптама, сот-медициналық сараптама, компьютерлік технологиялар мен мобильді құрылғыларды тағайындау туралы өтініші де қанағаттандырусыз қалдырылсын.
• Сондай-ақ судья BAU мейрамханасындағы куәгерлерді жауапқа шақыру туралы өтінішті де қанағаттандырудан бас тартты.
• Қорғаушы тараптың Ұлттық қауіпсіздік комитеті Шекара қызметінің шекарадан өту мәселелері бойынша сұрау салуын ұзарту, Бишімбаев пен Нүкенованың шоттарына қатысты банктерге сұрау салулар жіберу, Нүкенованың әкесінің психиатриялық есепте болуын тексеру туралы өтініші бас тартылуға жатады. Өйткені, бұл өтініштер де мерзімінен бұрын жіберілді.
• Куәлардың көпшілігі тізімде көрсетілген және сотта жауап алуға жататындықтан, сот өзі куә ретінде көрсеткен адамдарды сотқа шақыру туралы өтінішті қанағаттандырусыз қалдыру қажет деп санайды.
• Істі тоқтату немесе тоқтата тұру үшін ешқандай мән-жайлар жоқ.

Алайда, сот прокурорды айыптау қорытындысының көшірмесін сотталушы Байжановтың (Бишімбаевтың туысқан інісі - ред.) қорғаушыларына беруге міндеттеді.

Салтанат Нүкенованың өлімі

2023 жылғы 9 қарашада Астанадағы мейрамханалардың бірінде әйелдің дене жарақатынан қаза тапқаны туралы ақпарат пайда болды. Бұрынғы ұлттық экономика министрі Қуандық Бишімбаев күдікті екені белгілі болды.

Бишімбаевтың екінші әйелі Салтанат Нүкенова қаза тапқан болып шықты. Сондай-ақ Салтанат Нүкенова Павлодар қаласының бұрынғы әкімі Қайрат Нүкеновтің жиені екені белгілі болды.

12 қарашада Қуандық Бишімбаев екі айға қамауға алынды. Нүкенова қайтыс болған "Гастро-орталық" директоры да қамауға алынды. Ол қылмысты жасырды деген күдікке ілінді. Кейін полицейлер кісі өлтіру оқиғасы болған мейрамхананың бақылау камерасының бейнежазбаларын тәркіледі. Салтанаттың туыстары Қуандық Бишімбаевтың бауырын да жауапқа тартуды талап етті.

Қайғылы оқиға жайында президент Қасым-Жомарт Тоқаев пікір білдірді. Ол Нүкенованың өліміне қатысты істі ерекше бақылауда ұстауды тапсырды.

Ал ішкі істер министрінің орынбасары Марат Қожаев жас келіншек нақты қашан қайтыс болғаны медициналық сараптама қорытындысынан кейін анықталатынын айтты. Желтоқсан айының аяғында бұл іс туралы Қуандық Бишімбаевтың әкесі, мәжілістің бұрынғы депутаты Уәлихан Бишімбаев айтты.

"Ұлым өз ісіне сәйкес әділ жазасын алуы керек. Мен әке ретінде ұлым үшін қатты уайымдаймын, бірақ оны ақтамаймын. Мен биліктен көмек сұрап барған емеспін және бармаймын да", - деді ол.

Кейін Қуандық Бишімбаеваның бұрынғы әйелі Назым пікір білдірді. Зардап шеккен тараптың адвокаттары Салтанаттың туыстарының сөзіне сілтеме жасап, тараптар татуласуы мүмкін емес деп мәлімдеді.

Бұған дейін марқұмның ағасы Қуандық Бишімбаевқа қатысты сот ашық өтуін талап етіп отырғанын, өйткені марқұмның отбасы Бишімбаевтар отбасының сот процесіне ықпалынан қауіптенетінін айтқан.

2024 жылғы қаңтар айының басында Бишімбаев ісі бойынша тергеу аяқталғаны белгілі болды. ІІМ тергеу қандай баптар бойынша жүргізілгенін де атады: бұрынғы ұлттық экономика министрі екі бап бойынша, кісі өлтіру және азаптау, ал бауыры қылмысты жасырды деп айыпталып отыр.

11 наурызда атышулы іс бойынша алдын ала сот тыңдауы өтті. Сот залына журналистерді кіргізбеді, баспасөз өкілдері сот отырысын көрші бөлмеден теледидар арқылы бақылап отырды. Сот тыңдауында Бишімбаев кінәсін мойындамайтынын айтты. Сондай-ақ ол алқабилерге жүгінгісі келетінін жеткізді.

Алдын ала тыңдау барысында прокурор Салтанат Нүкенова өлтірілген күні марқұм әйел мен Қуандық Бишімбаевтың арасында не жағдай болғанын оқып берді.

Сонымен қатар Бишімбаевты қамау мерзімі 6 айға ұзартылды.