"Қуандықтың қолында пышақ болды": куәгерлердің бірі Салтанат Нүкенова өлтірілген күні көргендерін айтты

Астанада Салтанат Нүкенованың өліміне қатысты іс бойынша кезекті сот отырысы өтті. Сотта куәгерлердің бірі оқыс оқиға болған күні көргендерін айтты. Бұл туралы KAZ.NUR.KZ хабарлайды.

"Байжанов маған қоңырау шалып, BAU мейрамханасына тездетіп көтеріл деді. Мен бірден сол жаққа қарай бардым. Мен кірген кезде ол жерде жедел жәрдем болды, Қуандықтың қолында пышақ болды. Мен қорқып кеттім, ол пышақпен дәретханаға қарай кетіп қалды. Біз бірден оның соңынан бардық та, пышақты тартып алып, полицияның келуін күттік.

15-20 минуттан кейін полиция келді. Бишімбаев ештеңе айтпады, ол абдырап қалған күйде еді. Жалпы бәріміз де абдырап қалған едік, мен де қатты қорықтым. Оны көрген кезімде ол бірден дәретханаға кетіп бара жатты. Ол дәретхана есігін жауып алды, ал біз бірден артынан барып, оған ештеңе болмас үшін есікті ашып, пышақты тартып алдық та, полицияны күттік", - дейді куәгер.

Ол сондай-ақ Бишімбаевтың жылап, "мұны не үшін істедім, бұл не?" дегенін айтты.

"Ол әбден абдыраған күйде болды. Біз де абдырап қалған едік. Бақытжан да дәл сондай күйде болды. Мен оның не туралы айтып жатқанын білмедім. Кейін ғана өлім туралы білдім. Ол қарсыласпады, сондықтан біз пышақты бірден тартып алдық. Ол масаң күйде болды", - дейді куәгер.

Куәгер сондай-ақ Бишімбаевтың қайта-қайта "Оны мен өлтірдім бе?" деп сұрағанын да айтты.

"Содан соң мен Бақытжанның (Байжанов – ред. ескерт.) полиция шақырып, №1 VIP-кабинада оның әйелінің (Бишімбаевтың – ред. ескерт.) денесі жатқанын түсіндіргенін білдім. Біз оны ұстап тұрған кезде Бишімбаев әйелін өзі өлтіргенін, оның "№1 VIP-кабинада жатқанын айтты. Сондықтан ол өзін өлтіргісі келген болуы мүмкін", - деп қосты куәгер.

Қуандық Бишімбаев ісі

Еске салайық, 9 қарашада БАҚ пен Telegram-арналар бұрынғы ұлттық экономика министрі Қуандық Бишімбаев Астанада әйелін ұрып өлтірді деген күдікпен ұсталғанын хабарлады.

Астана қаласы полиция департаменті 9 қарашада елордадағы мейрамхана қонақтарының арасында жанжал шығып, салдарынан бір әйелдің қаза тапқанын растады. Елордалық ПД күдікті қамауға алынып, тергеу амалдары жүргізіліп жатқанын мәлімдеді.

Қуандық Бишімбаевтің ұсталғанын 10 қарашада Ішкі істер министрінің орынбасары Серік Сәрсенов растады.

12 қарашада Қуандық Бишімбаев екі айға қамауға алынды. Бұдан бөлек Бишімбаевтың әйелі қайтыс болған "Гастро-орталығының" директоры да қамауға алынды.

Астана қалалық ПД Бишімбаевтің ісі Ішкі істер басшылығының бақылауында екенін мәлімдеді.

Бұдан бөлек президент Қасым-Жомарт Тоқаев Ішкі істер министрлігіне резонанс тудырған бұл оқиғаны ерекше бақылауға алуды тапсырды.