Куәгер: Мемлекеттік күзет қызметі Салтанат Нүкенова өлтірілген күні "Гастроорталықты" тексерді

Салтанат Нүкенова өлтірілген күні Мемлекеттік күзет қызметі "Гастроорталыққа" барған. Бұл туралы сот отырысында куәгер айтты, деп хабарлайды KAZ.NUR.KZ.

"Гастроорталық" әкімшісі түнгі 23:00-ге дейін жұмыс істейтінін, кешке ғимараттың бірінші қабатын түнгі күзетшіге тапсыратынын айтты. Бұл ретте екінші қабат жұмысын жалғастыра береді және жалпы кіреберіс ашық қалады.

Ол кісі өлімі болған күні Бишімбаевты көрмегенін, сондай-ақ оның әйелін де көрмегенін айтты. Бұған дейін сотталушы балаларымен бірге "Гастроорталықтың" бірінші қабатына келген.

"8 қарашада мен ауысымнан кейін түнгі бірге таман кетіп қалдым. Қажет болмаса, мен BAU мейрамханасына бармаймын, менеджерді білемін. 9 қарашада таңғы сағат 10-да жұмысқа келдім. Байжановты көрдім. Ол сол күні маған телефон соғып, видеоларды өшіре аламын ба деп сұрады. Мен мұны қалай істейтінімді білмеймін дедім", - дейді куәгер.

Әкімшінің айтуынша, диспетчер бөлмесінің кілтін алған, ал әріптесі видеокамералардағы жазбаларды өшіре бастаған.

"Мен сұрамадым (неліктен видеоны өшіру керектігін – ред. ескертпесі), себебі мен онымен еркін сөйлескен емеспін, тек жұмыс жайында ғана сөйлесетінмін. Бұл жайында сұрау менің міндетім емес еді", - дейді қыз.

Ол екінші қабатта болып жатқандарды бірінші қабаттағы қызметкерлер естімегенін айтты.

"Бірінші қабатта музыка ойнап тұрады. Екінші қабаттағы мекемелер оқшауланған. Санитарлық күн бізде болмады. Мен санитарлық күн туралы білмедім.

Күзетші келесі күні Talan Towers-те өтетін президенттердің кездесуіне байланысты қызметкерлердің түннен бері сонда болғанын айтты. Сондай-ақ МКҚ қызметкері (Мемлекеттік күзет қызметінің қызметкері - ред. ескертпесі) маған келсін деп айтқанын айтты. Ол (тәртіп күзеті - ред. ескертпесі) күшейтуді айналып өту қажеттігін жеткізді.

Біз бірінші қабатты аралап шықтық. Екінші қабаттағы қызметкерлер келгенде мен оған хабарлаймын, ол көтеріле алады дедім", - дейді куәгер.

Әкімшінің айтуынша, МКҚ қызметкері екінші қабатты тексеруі керек болған. Ол Talan Towers "Гастроорталықтың" жанында орналасқанын және BAU балконы бизнес орталық жаққа қарайтынын атап өтті.

"Жарық жанған кезде мен қызметкерлердің келгенін түсіндім, мен МКҚ қызметкеріне хабарлап, оны мейрамханаға дейін шығарып салдым. Оны менеджер мен Байжанов ("Гастроорталықтың" директоры - ред. ескертпесі) қарсы алды. Мемлекеттік шаралар болған кезде қызметкерлеріміз кезекшілікте болады", - дейді куәгер.

Ол не жағдай болғанын полиция келген кезде білгенін атап өтті. Бұл кезде кино кеші өтіп жатқан, қонақтар фильм көріп отырған, сондықтан полиция қызметкерлері ғимаратқа жүгіріп кірген кезде оларды тыныштандыруға тура келген. Бірінші қабат жұмысын жалғастырған.

Айта кетейік, 9 қарашада Астанада Қасым-Жомарт Тоқаев пен Ресей президенті Владимир Путиннің кездесуі өтті.

Қуандық Бишімбаев ісі

Еске салайық, 9 қарашада БАҚ пен Telegram-арналар бұрынғы ұлттық экономика министрі Қуандық Бишімбаев Астанада әйелін ұрып өлтірді деген күдікпен ұсталғанын хабарлады.

Астана қаласы полиция департаменті 9 қарашада елордадағы мейрамхана қонақтарының арасында жанжал шығып, салдарынан бір әйелдің қаза тапқанын растады. Елордалық ПД күдікті қамауға алынып, тергеу амалдары жүргізіліп жатқанын мәлімдеді.

Қуандық Бишімбаевтің ұсталғанын 10 қарашада Ішкі істер министрінің орынбасары Серік Сәрсенов растады.

12 қарашада Қуандық Бишімбаев екі айға қамауға алынды. Бұдан бөлек Бишімбаевтың әйелі қайтыс болған "Гастро-орталығының" директоры да қамауға алынды.

Астана қалалық ПД Бишімбаевтің ісі Ішкі істер басшылығының бақылауында екенін мәлімдеді.

Бұдан бөлек президент Қасым-Жомарт Тоқаев Ішкі істер министрлігіне резонанс тудырған бұл оқиғаны ерекше бақылауға алуды тапсырды.