"Қазақстан түрлі бүлік пен алауыздықтан аман болғай": бас мүфти қасиетті Қағбада еліміз үшін дұға жасады (видео)

Қазақстан мұсылмандары діни басқармасының төрағасы Наурызбай қажы Тағанұлы Сауд Арабия Корольдігіне барған сапарында қасиетті Қағба ішіне кіріп, еліміздің игілігі үшін арнайы дұға жасады. Бұл туралы KAZ.NUR.KZ мүфтияттың ресми сайтына сілтеме жасап хабарлайды.

"Алланың қалауымен қасиетті Қағба ішіне кіріп, намаз оқып, дұға жасау нығметі нәсіп болды. Құлшылық пен тілектер сөзсіз қабыл болатын қасиетті орында халқымыздың бірлігі мен игілігі, қадірменді Мемлекет басшысы Қасым-Жомарт Кемелұлының ізгі бастамалары, жер бетіне тарыдай шашылған қандастарымыздың амандығы, дін қызметкерлерінің берекелі істері үшін арнайы дұға жасадым.

Алла Тағала еліміздің болашағын жарқын етіп, жұртымыздың дархан көңіліндей кең даламызға тыныштық пен тұрақтылық, бірлік пен береке бергей. Сүйікті Отанымыз Қазақстан түрлі бүлік пен алауыздықтан аман болғай. Тәуелсіздігіміз баянды болып, көк туымыз көк аспанымызда қияметке дейін желбіреп тұруын тілейміз.

Халқымыз аман, жұртымыз тыныш болғай. Әр шаңыраққа бақыт пен татулық, нығмет пен береке тілеймін. Деніміз қуатты, әр күніміз шуақты болғай. Еліміздің ертеңі үшін азаттық жолында құрбан болған ата-бабаларымыздың рухы жәннат төрінде шалқығай. Бабалар аманатын арқалаған тәуелсіз еліміздің азаматтарына Алланың өзі жар болғай. Баршаңызға қос дүниенің нығметін, жанның рахатын, тәннің саулығын тілеймін. Жаратушы Жаббар Иеміз исі мұсылман баласының мерейін үстем еткей. Әмин!" - деді бас мүфти.

Айта кетейік, бірер жыл бұрын Мекке қаласында кіші қажылығын өтеген Қасым-Жомарт Тоқаев Қағбаның ішіне кірген болатын.

Мәтіннен қате тапсаңыз, бізге жазыңыз