Түркістан облысындағы мектеп ауласынан 1353 жылы жасалған қол диірмендері табылған (фото)

Түркістан облысы Келес ауданындағы №31 Ш.Уәлиханов атындағы жалпы білім беретін мектеп ауласынан 1353 жылы тастан жасалған қол диірмендері табылған. Бұл туралы KAZ.NUR.KZ облыс әкімдігінің Facebook-тегі парақшасына сілтеме жасап хабарлайды.

Мектеп басшысының сөзінше, білім ордасындағы мұражайда ХVІІІ-ХІХ ғасырларға тиеселі ағаш шоқпар мен ожау, ежелгі қаңлы дәуіріне тиесілі саз балшықтан жасалған құмыралар мен ыдыстар бар. Сондай-ақ сөрелерге көне монеталар мен қоладан жасалған шәйнек, кесе секілді тұрмыстық заттар қойылған екен. Жәдігерлердің арасында 1353 жылы тастан жасалған қол диірмендері де бар.

"Жүзімдік ауылында орналасқан мектеп ауласына 1985-1986 жылдары археологиялық қазба жұмыстары жүргізілген. Жалпы аумағы 68 шаршы метр болатын мұражай екі бөлмеден тұрады. Экспозициялық бөлменің аумағы – 56 шаршы метр. Мұражайда жалпы 152 экспонат бар. Балалар қазіргі таңда осы жәдігерлерді зерттеп, ғылыми-зерттеу жұмыстарын да жазуда", - деді мектеп директоры Ақмарал Қамбарова.

Ұстаздардың айтуынша, қазіргі кезде де мектеп ауласында, ауыл маңында көптеген жәдігерлерді кездестіруге болады. Тарихшы мамандардың қорытындысына сәйкес, осы аймақтан табылған тарихи экспонаттар біздің заманымыздың I-XIII ғасырлардағы Қаңлы мемлекеті мен Қарахан мемлекеті кезеңдеріне жатады.

Еске салайық, Түркістан облысында жаңа археологиялық әдіспен зерттеу жүргізіліп, 2000 жыл бұрынғы тарихи ескерткіштер анықталғанын жазған едік.

Мәтіннен қате тапсаңыз, бізге жазыңыз