"Боран, тұман, көктайғақ": демалыс күндері Қазақстанда ауа райы қандай болады

Синоптиктер демалыс күндеріне арналған ауа райы болжамын ұсынды, деп хабарлайды KAZ.NUR.KZ "Қазгидромет" РМК-ға сілтеме жасап.

Метеорологтардың мәліметінше, демалыс күндері еліміздің батысында, солтүстік-батысында жауын-шашынсыз ауа райы күтіледі.

Ал республиканың қалған аумағында атмосфералық фронттардың әсерінен жауын-шашын (қар, жаңбыр) түсіп, көктайғақ болуы мүмкін. Қазақстанның шығысында боран соғып, екпінді жел тұруы ықтимал. Сондай-ақ республика бойынша тұман күтіледі.

Бұдан бөлек, батыста түнгі уақытта ауа температурасының -5…-13°С-қа дейін, солтүстік-батыста -13…-21°С-қа дейін, солтүстікте -7…-15°С-қа дейін, шығыста және орталықта -12…-20°С-қа дейін, оңтүстікте -1… -15°С-қа дейін, оңтүстік-шығыста -5…-10°С-қа дейін, таулы аудандарда -13…-23°С-қа дейін төмендеуі күтіліп отыр.

Естеріңізге сала кетейік, бұған дейін синоптиктер ақпан айында Қазақстанда ауа райы қандай болатынын болжаған еді.

Синоптиктердің болжамынша, бірінші онкүндіктің екінші жартысында суық антициклонның әсерінен елімізде ауа температурасының төмендеуі күтіледі.

Ақпанның екінші және үшінші онкүндіктерінде аязды күндер жылы күндерге алмасады, десе де қар жауып, тұман түсіп, көктайғақ болуы мүмкін.