Елордалық жеті жасар оқушы халықаралық ғылыми олимпиадада алтын медаль алды

Астаналық оқушылар халықаралық ғылыми олимпиадада алтын және қола медаль алды, деп хабарлайды KAZ.NUR.KZ елорда әкімдігінің ресми сайтына сілтеме жасап.

Әкімдіктің мәліметінше, №81 Astana English school халықаралық мектебінің 1-сынып оқушысы Нұрлан Бақдаулет StemCo халықаралық олимпиадасына қатысып, алтын медаль иеленген.

Ол "Математика және science" пәні бойынша үздік нәтиже көрсеткен. Алғашқы онлайн кезеңнен сүрінбей өткен жеті жасар Нұрлан Бақдаулет Сингапур қаласында өтетін финалдық кезеңге жолдама алып отыр.

Сондай-ақ осы олимпиадада 4-сынып оқушысы Зере Ақболат үшінші орынға ие болып, қола медаль еншілеген. Ол "Жаратылыстану" пәні бойынша бақ сынаған.

Айта кетейік, бұған дейін Қазақстан Орта Азиядағы білім сапасын бағалау бойынша аккредиттациядан өткен жалғыз ел атанғанын хабарлаған едік.