Каспий құбыр консорциумы нысанындағы жағдай қалай: Энергетика министрлігі мәлімдеме жасады

Энергетика министрлігі Каспий құбыр консорциумы нысанындағы жағдайға қатысты тағы да мәлімдеме жасады, деп хабарлайды ведомствоның Telegram-дағы арнасына сілтеме жасаған KAZ.NUR.KZ.

Ведомство мәліметінше, қазіргі уақытта КҚК тарапынан қазақстандық мұнайға шектеулер жоқ, қабылдау графикке сәйкес жүзеге асырылады.

"КҚК ақпаратына сәйкес, "Тенгиз – Новороссийск" магистральдық мұнай құбыры 2025 жылғы 17 ақпанда Мәскеу уақытымен сағат 02:50-де "Кропоткинская" мұнай айдау станциясының қатысуынсыз транзиттік режимде іске қосылды", - делінген хабарламада.

Айта кету керек, Украина қарулы күштерінің бас штабы әлеуметтік желіде 17 ақпанда ресейлік мұнай өңдеу зауыттарына, соның ішінде "Кропоткинская" станциясына соққы жасағанын растады.

Бұл туралы Украина қарулы күштері бас штабының Facebook парақшасында жарияланды.

"Кеше Украина қорғаныс күштері Ресейдегі стратегиялық әскери және отын-энергетикалық инфрақұрылым нысандарына жоғары дәлдіктегі соққы жасады. Сәтті операция нәтижесінде Ресейдің Краснодар өлкесіндегі Ильский мұнай өңдеу зауыты зақымданды. Нысанда ауқымды өрт тіркелді. "Кропоткинская" және "Андреаполь" мұнай айдау станцияларына да соққы жасалды. Олар соққыдан кейін істен шықты", - делінген хабарламада.