"Жауым көбейді": Алматы әкімі Досаев таулы аймақтағы құрылыс туралы айтты

Алматы әкімі Ерболат Досаев Бостандық ауданы тұрғындарымен кездесу барысында Ерменсай шағын ауданындағы көпқабатты тұрғын үйлердің құрылысына қатысты сұрақтарға жауап берді. Бұл туралы қала әкімдігінің баспасөз қызметіне сілтеме жасаған KAZ.NUR.KZ хабарлайды.

"Белгілі бір ауданда тұрғын үй кешендерінің құрылысына мораторий енгізу заң жүзінде мүмкін емес. Бірақ біз бұл мәселені реттеп отырмыз. Соңғы бірнеше жылда қанша жобаны мақұлдаудан бас тартқанымызды елестете де алмайсыздар. Таулы аймақта құрылыс жүргізуге рұқсат бермегенім үшін жауым көбейді", - деді Ерболат Досаев.

Оның айтуынша, заңдағы олқылық құрылыс компанияларына жеке тұрғын үйге арналған жерлерге аз қабатты кешендер салуға мүмкіндік беріп отыр.

"Біз заңнаманы жетілдіру бойынша ұсыныстар енгіздік және өз тарапымыздан құрылыс ережесін қатаңдаттық. Қазіргі уақытта бұл ереже тау бөктерін тегістеуге, таулы аймақтағы жоталар жолағында, соның ішінде еңісі 15 градустан жоғары жерлерде құрылыс жүргізуге тыйым салады", - деді Алматы әкімі.

Айта кетейік, бұған дейін Алматыда құрылысы 18 жыл бұрын басталған ірі нысан сүрілгенін хабарлаған едік.