"Анонимді хабарлама жіберіледі": елімізде автокөлік иелеріне арналған жаңа цифрлық қызмет іске қосылды

Қазақстанда көлік құралдарының иелеріне хабарлама жіберу үшін жаңа цифрлық қызмет іске қосылды, деп хабарлайды үкіметке сілтеме жасаған KAZ.NUR.KZ.

Жаңа цифрлық қызмет туралы үкімет отырысында цифрлық даму, инновациялар және аэроғарыш өнеркәсібі министрі Жаслан Мәдиев айтты.

Оның сөзінше жаңа цифрлық қызметті енгізу жалпыға ортақ пайдаланылатын жолдарда қауіпсіздік пен ыңғайлылықты қамтамасыз етеді.

"Егер сіз терезесі ашық қалған немесе өтуге кедергі келтіріп тұрған көлікті байқасаңыз, мемлекеттік нөмірді теріп, қажетті тетікті таңдасаңыз жеткілікті. Көлік иесіне анонимді хабарлама жіберіледі. Бұл сервис өзара көмектесудің әрі азаматтық жауапкершіліктің құралына айналады деп сенеміз", - дейді Жаслан Мәдиев.

Бұл қызмет түрі Ішкі істер министрлігімен бірлесіп іске асырылған.

Айта кетейік, бұған дейін елімізде әуе рейстерінің кешігуі кезінде жаңа қызмет көрсетілетінін хабарлаған едік. Бұл әуе билеттерін сатуға арналған қосымшаға енгізілген арнайы қызмет түрі, ол жолаушыларға рейс кешіктірілген жағдайда сақтандыруға және төлемдерді бірден алуға мүмкіндік береді.