Астанада Кәрім Мәсімовке тиесілі деген зәулім үй тәркіленді
Жарияланған күні:
Астанада ҰҚК-нің сотталған экс-төрағасы, бұрынғы премьер-министр Кәрім Мәсімовке тиесілі делінген үй әлеуметтік қажеттіліктер үшін тәркіленді, деп хабарлайды Қайтарылған активтерді басқару компаниясына сілтеме жасаған BAQ.KZ.
"Астана қаласының әкімдігінен аталған жылжымайтын мүлікті қаланың әлеуметтік қажеттіліктерін қанағаттандыру мақсатында беру жөнінде ресми сұраныс түсті. Әлеуметтік маңыздылығы мен заңнама талаптарын ескере отырып, бұл нысан электрондық сауда жоспарына шығарылды. Нысанды әрі қарай пайдалану жергілікті атқарушы органның мүдделерін ескере отырып, белгіленген тәртіппен шешіледі", - делінген Қайтарылған активтерді басқару агенттігі (KUVA.KZ) хабарламасында.
Әңгіме елорданың Нұра ауданына қарасты Қараөткел ықшамауданындағы особняк туралы болып отыр. Бұл үй қайтарылған активтерді басқару компаниясының балансында тұрған. Нысанның бастапқы бағасы 1,6 миллиард теңге болған.
Еске салсақ, бұған дейін Астанада Ұлттық қауіпсіздік комитетінің бұрынғы басшысы Кәрім Мәсімовтен тәркіленген коттеджге ұқсас үй аукцион арқылы саудаға шығарылды.
Мәтіннен қате тапсаңыз, бізге жазыңыз
Оригинал статьи: https://kaz.nur.kz/society/2240244-astanada-karim-masimovke-tiesili-degen-zaulim-ui-tarkilendi/