Астанада Кәрім Мәсімовтен тәркіленген үйге ұқсас коттедж аукционға қойылды (фото)

Опубликовано:10 ақпан 2025, 16:04

Астанада Ұлттық қауіпсіздік комитетінің бұрынғы басшысы Кәрім Мәсімовтен тәркіленген коттеджге ұқсас үй аукцион арқылы саудаға шығарылды. Бұл туралы KAZ.NUR.KZ Қайтарылған активтерді басқару компаниясының ресми сайтына сілтеме жасап хабарлайды.

Қайтарылған активтерді басқару компаниясының хабарлауынша, электрондық сауда 2025 жылғы 25 ақпанда сағат 10:00-де E-Qazyna веб-платформасында өткізіледі. Лоттың бастапқы бағасы – 1 883 338 958 теңге.

ауласы — Үйдің аумағы. Фото: e-auction.e-qazyna.kz

Лот сипаттамасында жертөлесі бар тұрғын үй Астана қаласы Нұра ауданында орналасқаны жазылған. Үй 2008 жылы салынған, құжаттары бойынша үй жертөледен бөлек тағы екі қабаттан тұрады.

Айта кетейік, ҰҚК 2022 жылы Кәрім Мәсімовтен тәркіленген мүліктің фотосуреттерін жариялаған. Онда электронды сауда алаңында жарияланған фотоларға сәйкес келетін бірнеше көлік пен үйдің суреттері болған.

Еске салайық, 2022 жылы 6 қаңтарда Кәрім Мәсімов ҰҚК басшысы қызметінен босатылып, кейін ол мемлекетке опасыздық жасады деген күдікпен ұсталғаны белгілі болды.

Ал 2023 жылы 24 сәуірде Астана сотында Кәрім Мәсімовке қатысты сот үкімі шыққанын хабарлаған едік. Ол 18 жылға сотталды. Сотта Мәсімов пен оның орынбасары Садықұловқа мемлекетке опасыздық жасау (175-баптың 1-бөлігі), билікті күшпен басып алу (179-баптың 3-бөлігі) және билік пен лауазымдық өкілеттігін (ҚК-тің 362-бабының 4-бөлігінің 3-тармағы) асыра пайдалану бойынша кінәлі деп танылған болатын.

Мәтіннен қате тапсаңыз, бізге жазыңыз