Қазақстан әуе компаниясы Пәкістан мен Үндістан қақтығысына байланысты Үндістанға рейстерін тоқтатты

Air Astana әуе компаниясы Үндістан мен Пәкістан арасындағы қақтығысқа байланысты Алматыдан Дели мен Мумбайға рейстердің тоқтатылатынын мәлімдеді. Бұл туралы тасымалдаушының баспасөз қызметіне сілтеме жасаған KAZ.NUR.KZ хабарлайды.

Үндістан мен Пәкістан арасындағы әуе кеңістігінің жабылуына байланысты Air Astana әуекомпаниясы 8 мамырдағы Алматы – Дели – Алматы бағыты бойынша KC 907/908 рейстерін және Алматы – Мумбай – Алматы бағыты бойынша KC 291/292 рейстерін тоқтатуға мәжбүр екенін хабарлады.

Орындалмайтын рейстердің жолаушыларына билеттердің толық құны қайтарылады.

Қазіргі уақытта әуе компаниясы Қазақстан Республикасының азаматтарын және Air Astana әуе компаниясының басқа да жолаушыларын балама бағыттар арқылы Отанына қайтару үшін репатриациялық рейстер ұйымдастыру мүмкіндігін қарастырып жатыр.

"Біз жағдайдың дамуын мұқият қадағалап отырмыз және жолаушыларды кез келген өзгерістер туралы жедел хабардар ететін боламыз" - делінген әуе компаниясының хабарламасында.

Үндістан мен Пәкістан арасындағы шиеленістің күшеюі

Сәуір айының соңында Үндістан үкіметі Кашмирдегі лаңкестік әрекеттен кейін өткізілген шұғыл отырыста Пәкістанға кең ауқымды дипломатиялық және визалық блокада енгізу туралы шешім қабылдады.

Отырыс қорытындысы бойынша Үндістан 1960 жылғы Инд өзенінің суы туралы келісімді тоқтату туралы шешім қабылдады. Үндістан сонымен бірге Пәкістанмен шекарадағы жалғыз ресми шекара бекеті Аттариді жауып тастады, Пәкістанның елдің визадан босату бағдарламасына қатысуын тоқтатты және екі елдегі дипломатиялық қызметкерлерді қысқартты.

Бұл 22 сәуірде Кашмирдің үндістандық бөлігінде қарулы адамдар туристер тобына оқ жаудырғанына жауап болды. Қаза болғандар мен жараланғандардың нақты саны әзірге белгісіз. 20-дан астам адам қаза тапқаны туралы ақпарат жарияланды.

Атап өтілгендей, атыс болған Пахалгам туристер көп келетін орын. Ол Үндістан да, Пәкістан да иелік етуді қалайтын даулы аумақта орналасқан.

Пәкістан үкіметі Үндістанның су ағынын тоқтату немесе бұру әрекетін "соғыс актісі" ретінде қарастыратынын мәлімдеді.

Кейін Пәкістанның Қорғаныс министрлігі әлеуметтік желілерде Үндістанмен соғысуға дайын екенін әрі оның бір аймағын жойып жіберетінін айтып қорқытып, бірқатар хабарлама мен видео жариялады.

Айта кетсек, Қазақстан президенті Тоқаев Үндістан премьер-министрі Нарендра Модиге Үндістанның солтүстігіндегі Пахалгам қаласында бейбіт тұрғындардың өліміне әкеп соқтырған лаңкестік әрекетке байланысты көңіл айту жеделхатын жолдады.

30 сәуірде Пәкістанның ақпарат министрі әлеуметтік желіде Үндістан алдағы 24-36 сағат ішінде оларға шабуыл жасауды көздеп отырғаны туралы сенімді барлау ақпараты бар екенін айтты. Үндістан мәлімдемеге түсініктеме берген жоқ. Сонымен бірге БАҚ Пәкістанның Үндістанмен шекарада атысты тоқтату келісімін алтыншы рет бұзғанын хабарлады.

Еске салайық, бұған дейін Пәкістан Үндістанға қарсы әскери әрекеттер шарттарын атады - елдің Қорғаныс министрлігінің басшысы олар соғысты эскалациясыз бастауды жоспарлап отырмағанын мәлімдеді, бірақ Үндістан Пәкістанға басып кіруге немесе шабуыл жасауға тырысса, олар "жауап беруге дайын" екенін алға тартты.

6 мамырда Үндістан "Синдур" әскери операциясын өткізіп, Пәкістандағы 9 нысанға шабуыл жасады. Үндістанның Қорғаныс министрлігі бейбіт тұрғындар қаза тапқаны және Пәкістан оған жауап ретінде соққы жасағаны туралы ақпарат таратты.